Sámediggi lágida sámeservviide ságastallandilálašvuođaid, mat gusket duohtavuohta- ja soabadanbarggu čuovvolanbarggu
Sámediggi lágida čavčča áigge ságastallandilálašvuođaid oassin sámiid duohtavuohta- ja soabadankomišuvnna loahpparaportta čuovvolanbarggu. Dilálašvuođat leat oaivvilduvvon sámeservviid ovddasteaddjiide ja lahtuide.
Sámeservviide oaivvilduvvon bovdejuvvon gussiid dilálašvuođaid mihttomearrin lea láhčit saji oktasaš ságastallamii, mas sáhttit ovttas suokkardallat soabadeami vejolašvuođaid, dárbbuid ja eavttuid sámeservodaga siste.
– Ságastallandilálašvuođaid mihttomearrin lea gullat sámeservodaga oainnuid das, makkár eavttuiguin soabadanbarggu galggašii joatkit duohtavuohta- ja soabadankomišuvnna loahpparaportta maŋŋá ja fállat vejolašvuođa oktasaš ságastallamii soabadeami mearkkašumis sámeálbmogii, dadjá Sámedikki ságajođiheaddji Pirita Näkkäläjärvi.
Ságajođiheaddji Näkkäläjärvi rahpá dilálašvuođaid. Báikki alde leat maiddái Sámedikki stivrra ovddasteaddjit gullamin servodaga oainnuid ja váldimin oasi ságastallamii. Dasa lassin mielde leat duohtavuohta- ja soabadanáššiid áššedovdit doallamin ovdaságaid ja dáiddalaš ovdanbuktimat movttiidahttimin oassálastiid ságastallat. Oassálastin lea vejolaš maiddái gáiddusin.
Dilálašvuođaide leat bovdejuvvon sámeservviid ovddasteaddjit ja lahtut, eaige dat leat almmolaččat rahpasat.
Sámediggi lea dál áiddo bargamin sámiid duohtavuohta- ja soabadankomišuvnna loahpparaportta ávžžuhusaid ovddideami ovdii. Ságastallandilálašvuođat leat oassi dán barggus. Dat čohkkejit oktii sámeservodaga oainnuid soabadanbarggu joatkimis ja dan boahttevuođas. Sámediggi ságastallá duohtavuohta- ja soabadanbarggus maiddái ovdamearkka dihte Nuortalaččaid siidačoahkkimiin, Sámi bálgosat rs:n, sámeguovllu bálgosiiguin ja Deanu osolašgottiiguin.
Lassidieđut:
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi
