Ná diŋgot oahppamateriálaid

Sámediggi buvttada ja ruhtada sámegielat oahppamateriálaid ovda- ja vuođđooahpahusa, logahagaid, ámmátlaš ja rávisolbmuid skuvlejumi dárbbuide. Lassedieđuid addá Sámedikki skuvlen- ja oahppamateriáladoaimmahat Anáris.

Ná diŋgot oahppamateriálaid

Bures boahtin diŋgot Sámedikki oahppamateriálaid! Čohkke buot girjjiid, maid háliidat diŋgot, oasttusgorii ja sádde diŋgojumi skuvlen- ja oahppamateriáladoaimmahahkii. Go diŋgomuš lea vuostáiváldon, mii sáddet dutnje rehkega, mii sisttisdoallá poastagoluid báhka deattu mielde. Báhkka sáddejuvvo, go rehket leat máksojuvvon.

Skuvllaide

Sámediggi juohká nuvttá iežas sámegielat oahppamateriála Suoma vuođđoskuvllaide, nuppi dási oahppolágádusaide ja sámegielat árrabajásgeassinossodagaide. Oahppogirjjit doaimmahuvvojit jogo poastta mielde dahje daid sáhttá viežžat Sajosis. Skuvllain berrojuvvo poastagolut.

Fuomáš doaimmahanáiggiid! Sávvat, ahte skuvllat diŋgojit čavčča oahppogirjjiid jo giđđat ovdal go skuvla nohká, vai girjjit leat skuvllas áiggil go skuvla álgá.

Priváhta olbmot

Maiddái priváhta olbmot sáhttet diŋgot Sámedikki oahppamateriálaid. Fuomáš! Rehkegii lasihuvvo poastagolut pákeha deattu mielde. Páhkka sáddejuvvo go rehket lea máksojuvvon.

Diŋgojumit olgoriikii

Go oahppamateriála diŋgojuvvo olgoriikii, de rehkega galgá vuos máksit ja dan maŋŋá girjjit sáddejuvvojit diŋgojeaddjái.

Digitála materiála

Sámediggi juohká nuvttá iežas sámegielat oahppamateriála Suoma vuođđoskuvllaide, nuppi dási oahppolágádusaide ja sámegielat árrabajásgeassinossodagaide.

Gávnnat oahpahusa veahkkin materiálaid maiddái Oktavuohta -siidduin.

Vulobealde leat sierra rávvagat skuvllaide ja ovttaskasolbmuide digimateriálaid atnui váldimii.

 

SKUVLLA JA OAHPAHEADDJI RÁVA

Sámedikki digitála oahppomateriálat leat jagi 2025 álggus sirdojuvvon geavahan láhkai Otava fierpmebálvalusaid bokte.

Skuvllain oahpaheaddjit ožžot digitála oahppomateriálaid atnuideaset Otava Nova-birrasis (ovddeš Opepalvelu). Skuvllain Nova-bajásdoalli bovde ođđa oahpaheaddji Nova geavaheaddjin ja laktá su skuvlla oahpaheaddjin. Jus oahpaheaddjis eai leat dovddaldagat dahje son háliida searvat ođđa skuvlii, galgá son leat oktavuođas skuvlla Nova-birrasa bajásdoallái. Dábálepmosit bajásdoallin lea skuvlačálli dahje rektor. Diehtosuoji dáfus buot geavaheddjiide gusto Otava diehtosuodječilgehus.

Jus skuvllas ii leat vel anus iežas Nova-biras, de birrasa rahpama várás skuvla sáhttá sáddet iežas dieđuid Sámediggái. Sámediggi sádde viidásit dieđuid Otavai, gos skuvlii rahppojuvvo iežas Nova-biras. Dieđut, mat unnimusat galget leat:

  • Skuvlla namma
  • Poastačujuhus
  • Poastanummir
  • Poastadoaibmabáiki
  • Oktavuođaolbmo namma
  • Oktavuođaolbmo šleađgapoastačujuhus
  • Oktavuođaolbmo telefonnummir

Skuvlla dieđut sáddejuvvojit šleađgapoastačujuhussii digimateriaalit (ät) samediggi.fi. Sámediggi ii dárbbaš dieđuid skuvlla oahpaheddjiin iige sin Nova-dovddaldagain.

Skuvlii nammaduvvon oktavuođaolmmoš doaibmá Nova-birrasa bajásdoallin. Skuvllas lea vejolaš lasihit bajásdoallin maid eará bargiid dahje hálddahusbargiid. Liŋka rávvagiidda lea Liŋkkat Otava bagadallansiidduide -oasis.

Sámediggi fuolaha ođđa oahppomateriálaid Nova-birrasii Sámeguovllu vuođđoskuvllaide, logahagaide ja joatkkaskuvllaide (Anára, Ohcejoga, Eanodaga ja Soađegili gielddain) sihke ovttaskas skuvllaide Sámeguovllu olggobealde, jus Sámedikkis leat skuvllaid Novai guoski dieđut . Jus oahpaheaddjit fuomášit ahte mii nu digitála oahppomateriála váilu Novas, dan birra sáhttá almmuhit Sámedikki skuvlen- ja oahppomateriáladoaimmahahkii.

Sámedikki digitála oahppomateriálat leat skuvllaide geavahusas skuvlajagi hávális ja Sámediggi fuolaha materiálaide guoski liseanssaid ođadeami ovdal skuvlajagi álggu.

Liŋkkat Otava suomagielat bagadallansiidduide:

Fuobm! Otava fierpmesiidduid rávvagat eai buot osiin guoskka Sámedikki digitála oahppomateriálaid geavaheami dahje diŋgoma. Sámedikki digitála oahppomateriálaid geavaheapmái ja diŋgomiidda guoski rávvagat gávdnojit Sámedikki oahppomateriálagávppis dahje jearadettiin skuvlen- ja oahppomateriáladoaimmahagas.

 

OVTTASKASOLBMOT

Ovttaskasolbmot sáhttet diŋgot Sámedikki buvttadan digimateriálaid iežaset geavahussii Sámedikki oahppomateriálagávppis.

Go ovttaskasolmmoš ii gula makkárge Suoma beale vuođđoskuvlla, joatkkaskuvlla dahje eará skuvlalágádusa oahpaheddjiide dahje studeantajovkui, son sáhttá ovttaskasolbmon oažžut Sámedikki digitála oahppomateriálaid iežas geavahussii Otava Nova-birrasa (ovddeš Opiskelijan maailma) bokte.

Ovdamearka Otava Nova-bálvalusa siiddus go geavaheaddji lea čálihan sisa bálvalussii ja sus leat materiálat geavahusas. Govva: Sámediggi.

 

Ovttaskasolmmoš galgá álggos registreret iežas geavaheaddjin Otava Nova-bálvalussii. Registrerema lea vejolaš dahkat maid ruoŧa- dahje eŋgelasgillii go molsu siiddu giela. Diehtosuoji dáfus buot geavaheddjiide gusto Otava diehtosuodječilgehus. Sin diehtosuodječilgehus lea maid ruoŧa- ja eŋgelasgillii. Rávvagat registreremii gávdnojit registrerensiiddu bokte.

Registrerema maŋŋá ovttaskasolmmoš almmuha Sámedikki skuvlen- ja oahppomateriáladoaimmahahkii dieđu iežas Nova-bálvalusa geavaheaddjidovddaldaga. Diehtu sáddejuvvo šleađgapoastačujuhussii digimateriaalit (ät) samediggi.fi. Geavaheaddjedovddaldahkii laktáseaddji suollemassáni Sámediggi dahje eará oassebealli ii jeara, iige dan galgga sádde šleađgapoasttain geasage.

Go diehtu geavaheaddjedovddaldagas lea boahtán Sámedikki skuvlen- ja oahppomateriáladoaimmahahkii, sáddejuvvo dan birra diehtu viidásit Otavai. Geavaheaddjedovddaldahkii laktojuvvo dat digitála oahppomateriálat, maid geavaheaddji lea Sámedikkis diŋgon. Sámediggi fuolaha geavaheaddji oastán materiálain dieđuid Otavai.

Ulbmilin lea ahte diŋgojuvvon materiálat oidnogohtet Otava Nova-bálvalusas moatti árgabeaivvi sisa, muhto jus laktin sakka maŋŋona, boahtá das almmuhus Sámedikkis. Fuomášanveara ášši lea diŋgojumiid gieđahallanáiggit, mat gusket Sámedikki fierpmegávppi. Dat sáhttet váikkuhit maiddái digitála materiálaid diŋgojumiid gieđahallamiidda ja dan bokte bálvalanbálgá johtilvuhtii.

Sámedikkis ostojuvvon digimateriálaid geavaheapmi ii leat dál ráddjejuvvon áigái, muhto teknihkalaš ollašuhttinsivaid geažil digitála oahppomateriálat meroštallojuvvojit oidnot oahppojahkái hávális. Sámediggi figgá ođadit materiálaide laktáseaddji liseanssaid ovdal oahppojagi álggu. Jus goittotge juoga materiála heaitá jagiid áigge oidnomis, sáhttá dan birra leat oktavuođas Sámedikki skuvlen- ja oahppomateriáladoaimmahahkii.

Liŋkkat Otava suomagielat bagadussiidduide:

Fuobm! Otava fierpmesiidduid rávvagat eai guoskka buot osiin Sámedikki digitála oahppomateriálaid geavaheami dahje diŋgoma. Sámedikki digitála oahppomateriálaid geavaheapmái ja diŋgomiidda guoski rávvagat gávdnojit Sámedikki oahppomateriálagávppis dahje jearadettiin skuvlen- ja oahppomateriáladoaimmahagas.