Duodji ealáhussan -seminára čohkke duodjeservoša ja duodjeberošteaddjiid Gárasavvonii skábmamánus
Interreg Aurora -prográmma ruhtadan Duodji Akademiija 2027 -fitnu ordne Duodji ealáhussan -seminára Gárasavvonis 7.11.2026.
Seminára fáddan lea duodji ealáhussan ja dan sajádaga nannen. Beaivvi áigge ságastallat duoji vejolašvuođain sisaboađu gáldun ja juohkit vásáhusaid ja oainnuid das, man sajádaga sáhtašii ovddidit. Fáddan leat earret eará hatti bidjan duodjái ja ehtalaš ja suvdilis gávppašanvuogit.
Dilálašvuođas beassá ságastallat eará duodjedoaibmiin ja hukset fierpmádagaid. Dilálašvuhtii bovdet duojáriid, duodjeberošteaddjiid, duodjefitnodatolbmuid, duodjeorganisašuvnnaid ja eará doibmiid, mat barget duodjeealáhusain Suoma, Norgga ja Ruoŧa bealde.
Seminárii ordnejuvvo nuvttá sáhttu Guovdageainnus Heahtá bokte Gárasavvonii ja ruovttoluodda Guovdageidnui seamma beaivvi áigge. Almmut, jos áiggut searvat oktasaš sáhttui ja gokko áiggošit njuiket giktii.
Seminára prográmma
7.11.2026
Báiki: Karesuando Församlingsgård (Laestadiusvägen 81, Karesuando)
Gáiddusoassálastinvejolašvuohta
(Rievdadusat prográmmii leat vejolaččat)
(Fuom! Prográmma áigedávval lea Ruoŧa/Norgga áiggis!)
10.00 Báikki nala boahtin ja iđitgáffe dahje -deadja
10.30 Buresboahtin ja beaivvi sisdoallu
10.50 Duodji lea árvu -čájáhusa ovdanbuktin (Sámi Duodji Sameslöjdstiftelsen)
11.30 Panelaságastallan: Duoji sajádaga nannen sisaboađu gáldun
12.30 Lunšaboddu
13.30 Ságastallan: Ehtalašvuođa, sámekultuvrra gudnejahttima ja suvdilis ovdáneami vuhtii váldin duoji vuovdimis
14.45 Gáffe dahje deadja
15.15 Bargobádji: Duoji hatti árvvoštallan (Sieva Design)
16.15 Loahpahansánit ja oktiigeassu
16.30-17.30 Friddja servvoštallan
Semináras lea dulkon suomagillii, davvisámegillii ja skandinávalaš gillii (“svorsk”).
Oassálastit sáhttet váldit iežaset duodjeprošeavtta mielde ja duddjot seminára áigge.
Dáhpáhus lea nuvttá.
Almmuheapmi ja oassálastin
Sii, geat bohtet báikki nala, galget almmuhit iežaset ovddalgihtii ja seammás almmuhit biebmoallergiijaid.
Sáhtát almmuhit iežat jogo neahttasiiddu bokte dahje váldde oktavuođa:
birit.tornensis@samediggi.fi
+358 40 545 7740
Almmut iežat maŋimustá 29.10.2026.
Lassedieđut
Birit Tornensis
birit.tornensis@samediggi.fi
+358 40 545 7740
Lassedieđut Duodji Akademiija 2027 -fitnus:
Duodji Akademiija 2027 | Sámediggi
Čuovo fitnu sosiála medias:
Instagram
