Duodji Akademiija 2027 -prošeakta fidnii ođđa bargi
Interreg Aurora -prográmma ruhtadan Duodji Akademiija -prošeakta nanne ja buorida duoji sajádaga. Čakčamánus 2026 prošeavttas álggahii ođđa prošeaktabargi, gean Norgga beale Sámediggi bálkáhii.
Sárá Gáren Ánne Nilut
Govva: Dánil Røkke
Duodji Akademiija 2027 -prošeakta álggii jagis 2025. Prošeavtta mihttomearrin lea nannet ja buoridit duoji sajádaga earret eará nu ahte duddjomii, oahppamii ja árbedieđu sirdimii addit eanet vejolašvuođaid.
Prošeavtta plánejeaddjin lea dan álgima rájes doaibman Suoma beale Sámedikki bálkkáhan Gárena-Biera Biera Juha Biret, Birit Tornensis. Čakčamánus 2026 prošeakta fidnii ođđa bargi, go Norgga beale Sámediggi bálkkáhan ođđa prošeaktabargi álggahii, son lea Ole Heikka Mikkela Sárá, dahje Bella Inger Márjjá Sárá, Sárá Gáren Ánne Nilut.
Ođđa prošeaktabargi lea válbmanan duoji kandidáhtan Sámi allaskuvllas Guovdageainnus. Son buktá prošektii varas máhtu ja movtta, son háliida ovddidit duddjoma ja searvvušlašvuođa.
– Lean hui movttet go beasan duodjesuorggis bargat. Aitto válbmejin duodjebachelora Sámi Allaskuvllas Guovdageainnus, ja dán barggu bokte beasan máhtu atnit sámi servodahkii buorren, lohká Nilut.
Prošeavtta boahttevaš bargobájiid ja semináraid mihttomearrin lea buktit oktii iešguđetahkásaš ja iešguđet vuolggasajiin boahtti duojáriid ja ordnet diliid, main dieđu, dáidduid ja vásáhusaid sáhttá juohkit servošiin. Dáhpáhusat nannejit duoji ealli árbevierrun.
– Illudan čohkket duodjeberošteddjiid, sihke eallilan duojáriid ja aiddoálgiid, ságastallat, duddjot ja guhtet guimmiineamet oahppat! Sávan láhčit oadjebas bargobájiid ja gilvit duodjemovtta oasseváldiide.
Duodji Akademiija 2027 lea Suoma ja Norgga beale Sámedikkiid oktasaš prošeakta.
Oktavuohtadieđut
Birit Tornensis
Plánejeaddji, Duodji Akademiija 2027
040 545 7740
birit.tornensis@samediggi.fi
Sárá Gáren Ánne Nilut
+47 78484201
sani@samediggi.no
