Eanadoalu álgobuvttadeami ođasmahtton gaskaboddosaš doarjja ohcan láhkai skábmamánu 4. beaivve rájes
Stáhtaráđđi mearridii eanadoalu álgobuvttadeami gaskaboddosaš doarjaga ođđa kriterain golggotmánu 29. beaivve. Doarjaga lea vejolaš ođastusaid dihtii čuozihit koronaviruspandemiijas eanet gillán álgobuvttadeami fitnodagaide. Doarjaga ohcan ođasmahtton eavttuiguin álgá skábmamánu 4. beaivve. Doarjaga ohcan joatkašuvvá muđui seammá láhkai go dánge rádjai.
Eanadoalu álgobuvttadeami doarjja lea dárkkuhuvvon suorggis doaibmi, koronaviruspandemiijas njuolgga gillán fitnodagaide. Dakkárat leat ovdamearkan dakkár spesialiseren boazodálut, geat vuvdet buktagiid njuolgga restoráŋŋaide dahje eará oastiide ja geaid buktagiid johtu lea bissánan dahje čielgasit hedjonan pandemiija dihtii.
Stáhtaráđđi mearridii bajidit eanadoalu álgobuvttadeami fitnodatdoarjaga badjerájá 10 000 euros 80 000 euroi. Doarjaga vuollerádjá vuoliduvvo 5 000 euros 2 000 euroi. Stáhtaráđđi mearridii maiddái joatkit doarjaga fámus orrunáigge 30.6.2021 rádjai.
Doarjaga sáhttá ođasmahtton kriteraid vuođul mieđihit buvttadusealliid dearvvasvuođa ja fitnodatdoaimma jotkkolašvuođa sihkkarastima dihtii vealtameahttun fuođđariid skáhppomii. Eará investeremiidda dahje buvttadanresurssaid skáhppomii doarjja ii mieđihuvvo.
”Sámediggi atná doarjaga badjerájá bajideami, doarjaga fámus orrunáigge joatkima ja vealtameahttun fuođđariid skáhppoma doarjuma buorre ođastussan. Vaikke Sámedikki evttohus guoskkadin bohccobierggu kilohatti njiedjamis šaddan massimiid, ii leatge ásahusas vuhtii váldon, leat dahkkon ođastusat dárbbašlaš buorádusat badjealbmáid ekonomalaš dillái”, namuha Sámedikki ságajođiheaddji Tuomas Aslak Juuso.
“Sámediggi evttohii ásahushápmosis addin cealkámušas, ahte doarjaga vuollerádjá vuoliduvvošii 5 000 euros 2 000 euroi, vuoi doarjaga vuollerádjá livččii buorebut heivehuvvon badjealbmáid boahtodássái ja vuoi vuollerádjá livčče ovttaveardásaš sierra ealáhusaid gaskkas. Ovdamearkan guolledoallu gullá almmolaš goasttádusdoarjaga ollái, man vuollerádjá lea 2 000 euro. Lea buorre ja hui dárbbašlaš, ahte Sámedikki evttohus vuollerájá vuolideamis oidno dál ásahusas”, dadjá Sámedikki ealáhusčálli Sarita Kämäräinen.
Eana- ja meahccedoalloministeriija dieđáhus 29.10.2020
Lassidieđut:
Ságajođiheaddji Tuomas Aslak Juuso tel. 040 687 3394 / 010 839 3101, tuomas.juuso(at)samediggi.fi
II várreságajođiheaddji Leo Aikio tel. 040 621 6505 / 010 839 3180, leo.aikio(at)samediggi.fi
Ealáhusčálli Sarita Kämäräinen tel. 040 186 7258 / 010 839 3143, sarita.kamarainen(at)samediggi.fi
