Jagi 2026 kulturbálkkašumit Maire Saijetsii ja Maarit Länsmanii - bálkkašumit juhkkojit Anáris 29.5. ja Ohcejogas 19.6.
Sámedikki kulturlávdegoddi juohká jagi 2026 kulturbálkkašumiid Anár 150 ja Ohcejohka 150-ávvujagiid gudnin anárlaš Mihku Elle Mairei, Maire Saijetsii ja servoša giela ja kultuvrra gáhttejeaddjái, ohcejohkalaš Rájájon Márehii, Maarit Länsmanii.
Kulturbálkkašupmi mieđihuvvo almmá ohcamuša haga ja dan dárkkuhussan lea bálkkašit kulturbargi dahje dáiddára addimiin sutnje dovddastusa mearkkašahtti barggus sámi kultureallima buorrin.
Maire Saijets (Govva: Riitta Orti-Berg) ja Maarit Länsman (Govva: Jonna Lähteenmäki)
Maire Saijets kulturbálkkašumi juohkindilálašvuohta
Bearjadaga miessemánu 29. beaivve 2026 dmu 9-11
Sámekulturguovddáš Sajosis
Anáris Sámi oahpahusguovddáža giđđaávvudeamis.
Maire Saijets (1963) duodjeoahpaheaddji lea bajásšaddan duodjebearrašis Anárjohsiste Mihku báikkis, Anáris. Son lea čađahan Sámi oahpahusguovddážis duodjesuorggi spesiálaámmátdutkosa, man maŋŋá son lea bargan duodjeoahpaheaddji bargguin. Maire oahpai juo ruovttustis atnit árvvus vánhemiid duodjedáiddu. Rávesolbmuidskuvlla ja Sámi oahpahusguovddáža kurssain son álggii ieš duddjot viššalit, ja doppe son beasai maiddái oahpásmuvvat iešguđetlágan materiálain duddjojuvvon dujiide.
Maarit Länsman kulturbálkkašumi juohkindilálašvuohta
Bearjadaga geassemánu 19. beaivve 2026 dmu 17 rájes
Ohcejohka Šearrá-dáhpáhusa oktavuođas Onnela dearpmi alde
Maarit Länsman (1944) ealáhatolmmoš lea eret Skadjanjárggas, Ohcejogas. Son lea válmmaštuvvan ruovttudivššárin, bargan eallinbarggu ruovttudivššárin ja bearašbargin Ohcejogas. Máret, Ohcejohkalaččaid ruovttudivššár ii leat fuolahan dušše árgga bargguin muhto maiddái oamastan iežas servošeamet buresveadjimii. Kultuvra oidnui ja giella gullui buot su doaimmain árbevieruid gáhttemis. Su barggu mearkkašupmi ollá guhkás máŋgga bulvii.
Prográmmas ee. musihkka, friija sisabeassan.
Lassidieđut
Riitta Orti-Berg
Spesiálaáššedovdi
010 839 3103
riitta.orti-berg@samediggi.fi
