Jiekŋameara ruovdemáđija bissu eanangoddelávas viiddes vuostálastimis fuolakeahttá

Lappi lihtu stivra mearridii geassemánu 8. beaivve dohkkehit vástagiid Davvi-Lappi eanangoddelávvaevttohusas ožžojuvvon eiseválddiid cealkámušaide ja ain ásahit lávvaevttohusa almmolaččat oaidnin láhkai, ja dákko bokte ii váldán vuhtii áššis addojuvvon oainnuid. Jiekŋameara ruovdemáđija bissu eanangoddelávas viiddes vuostálastimis fuolakeahttá.

Sámediggi lea máŋgii iešguđet bealiváldimiin ja cealkámušain ovdanbuktán vuostálastit Jiekŋameara ruovdemáđija merkema eanangoddelávvii oba rávaláganin. Sámediggi ovdanbuvttii iežas oainnu maiddái cealkámušastis eanangoddelávvaevttohusas, mas eiseválddit adde cealkámušaid 28.1.-28.2.

Politihkalaš mearrádus máđija linnjemis Davvi-Suoma guovllus lea dahkkojuvvon Lappi lihtus almmá doarvái viiddes váikkuhusaid árvvoštallama haga, iige dat dákko bokte vuođđuduva áššáigullevaš plánemii ja válmmaštallamii. Jiekŋameara ruovdemáđidjii laktáseaddji plánaid mielde sámiid eallinbirrasii, gillii, servošii ja árbevirolaš ealáhusaide čuohcá stuorra áitta, daningo máđija luddešii buot golmma sámegiela váimmusguovlluid.

– Sámedikki oainnu mielde lávvamerkejupmái, mii dahká Jiekŋameara ruovdemáđija vejolažžan, eai leat dohkálaš ákkat. Bukten vel Lappi lihtu stivrra čoahkkimis ovdan, ahte lávain leat ruossalasvuođat Suoma vuođđolágain ja riikkaidgaskasaš soahpamušaid olis eamiálbmogiidda dorvvastuvvon vuoigatvuođaiguin ja danin eanangoddelávva galggašii máhcahuvvot válmmaštallamii ja Jiekŋameara ruovdemáđija -merkejupmi galggašii váldojuvvot eret eanangoddelávas, dadjá Sámedikki I várresátnejođiheaddji Anni Koivisto.

Koivisto lea nammaduvvon Sámedikki ovddasteaddjin Lappi lihtu stivrii ja oassálasttii stivrra čoahkkimii geassemánu 8. beaivve. Sámedikki áššedovdilahtus lea Lappi lihtu stivrra čoahkkimiin oassálastin- ja hállanvuoigatvuohta, muhto ii vuoigatvuohta dahkat evttohusaid dahje jienastit. Stivrra čoahkkimis dahkkojuvvui evttohus máđidjamerkejumi eretváldimis, muhto evttohus fámohuvai, go dat ii guottihuvvon.

Máđidjafidnu vuostálastojuvvo viidát maiddái eará doibmiid siste. Sámedikki lassin negatiivvalaš oainnu leat ovdanbuktán Nuortalaččaid siidačoahkkin, Bálgosiid ovttastus, Sámemusea Siida, guovllu bálgosat, Ohcejoga gielda, máŋggat sáme- ja eará searvvit, gilidoaibmagottit ja máŋggat priváhttaolbmot. Anára gielda evttohii, ahte ruovdemáđidjalinnjen čujuhuvvo dušše oktavuođadárbun dahje sulalaš avádahkan Anárjávri lulábealde. Johtolat- ja dieđujuohkinministeriija buvttadan čielggadeami mielde Jiekŋameara ruovdemáđija ii leat ekonomalaččat gánnáhahtti.

Sámedikki cealkámuš Davvi-Lappi eanangoddeláva 2040 -evttohusas

Lassedieđut:

I várresátnejođiheaddji Anni Koivisto tlf. 040 415 5969, anni.koivisto(at)samediggi.fi

sátnejođiheaddji Tuomas Aslak Juuso tlf. 040 687 3394, tuomas.juuso(at)samediggi.fi

Govva: Anja Vest