“Juohke sápmelaččas lea vuoigatvuohta leat dakkár go lea” – Sámediggi sávvá buori Pride-mánotbaji!
Geassemánnu lea Pride-mánotbadji, goas miehtá máilmmi lágiduvvojit dáhpáhusat seksuála- ja sohkabeallevehádagaid ovttaveardásašvuođa ovddideami beales. Sámediggi sávvá buohkaide buori Pride-mánotbaji!
Sápmi Pride Ohcejogas jagi 2021 Govva: Ville Fofonoff / Sámediggi
Ovttaveardásašvuohta lea dehálaš árvu maiddái Sámedikkis, man doaibmaprográmmas 2024–2027 ovttaveardásašvuohta lea loktejuvvon Sámedikki doaimma oktan árvun.
Sámedikki válgabaji 2024–27 doaibmaprográmmas lea mearrádus arvedávgepolitihkalaš prográmma ráhkadeamis. Sámedikki nuoraidráđi mihttomearrin lea maiddái dán baji áigge oažžut arvedávgesániid jorgalanbarggu gárvvisin.
Arvedávgesámit leat sámeservoša árvvolaš oassi, dadjá Sámedikki ságajođiheaddji Pirita Näkkäläjärvi.
– Juohke sápmelaččas lea vuoigatvuohta leat dakkár go lea. Sámedikkis mii galgat ovddidit politihka, mii fállá dohkkeheami vuoiŋŋa sámi servošis. Arvedávgepolitihkalaš prográmma váldin válgabaji 2024–27 doaibmaprográmmii sádde nana signála das, ahte Sámediggi lea sámi LGBTQ+-servoša doarjjan ja háliida buoridit dan jiena gulloma sámi servošis, dadjá ságajođiheaddji Näkkäläjärvi.
Dán jagi Sápmi Pride lágiduvvo Norgga bealde
Sápmi Pride ordnejuvvo jahkásaččat iešguđet guovllus Sámis. Dán jagi Sápmi Pride ordnejuvvo 11.–13.10. Norgga beale Sámis Budejjus, Nordlándda fylkkas.
Maiddái Suoma sámeguovllus Anáris ordnejuvvo iežas Pride-dáhpáhus. Anára Pride lágiduvvo 29.6. ja dat dollojuvvo dán jagi goalmmát geardde. Sámediggi levge Anára Pride gudnin Sajosis sihke Sámi ja Suoma leavggaiguin, ja maiddái sámi Pride-leavggain.
Sámediggi sádde ovddasteaddjiid sihke Sápmi Pride- ja Anára Pride -dáhpáhusaide.
