“Juõʹǩǩ säʹmmlast lij vuõiggâdvuõtt leeʹd jiõčč jiiʹjjesnallšem” – Sääʹmteʹǧǧ tuäivat šiõǥǥ Pride-määnpââʹj!
Ǩieʹssmään lij Pride-määnpââʹjj, kuäʹss pirr maaiʹlm jäʹrjstet noorõõttmõõžžid seksuaal- da sookkpieʹlluuʹccbõõzzid kuulli oummui õõutverddsažvuõđ õõuʹdeem diõtt. Sääʹmteʹǧǧ tuäivat pukid šiõǥǥ Pride-määnpââʹj!
Sääʹm Pride Uccjooǥǥâst eeʹjj 2021. Snimldõk: Ville Fofonoff / Sääʹmteʹǧǧ
Õõutverddsažvuõtt lij kaallšõs ärvv še Sääʹmteeʹǧǧest, koonn toiʹmmjemprograammâst 2024–2027 õõutverddsažvuõtt lij kaggum õhttân Sääʹmteeʹǧǧ toiʹmmjem ärvvan.
Sääʹmteeʹǧǧ vaalpââʹj 2024–27 toiʹmmjemprograammâst lij tuʹmmstõk âʹbrrjohsspoliittlaž prograamm raajjmõõžžâst. Sääʹmteeʹǧǧ nuõrisuåvtõõzz täävtõsân lij jooʹtti pââʹjest veâl säʹtted âʹbrrjohss-sannõõzz jåårǥlâʹttemtuâj ǩiõrǥtum.
Âʹbrrjohss-säʹmmla lie kaallšõs vueʹss sääʹmõõutstõõzzâst, särnn sääʹmteeʹǧǧ saaǥǥjååʹđteei Pirita Näkkäläjärvi.
– Juõʹǩǩ säʹmmlast lij vuõiggâdvuõtt leeʹd jiõčč jiiʹjjesnallšem. Meeʹst sääʹmteeʹǧǧest âlgg raajjâd politiikk, kååʹtt tuejjad priimmâm toobdâlm sääʹm õutstõõzzâst. Âʹbrrjohsspoliittlaž prograamm välddmõš vaalpââʹj 2024–27 toiʹmmjemprograʹmme vuõlttad raavâs saaǥǥ tõʹst, što Sääʹmteʹǧǧ lij sääʹm LGBTQ+-õõutstõõzz tuärjjan da haaʹlad ravsmâʹtted tõn jiõn kollʼjummuž sääʹm õhttsažkååʹddest, särnn saaǥǥjååʹđteei Näkkäläjärvi.
Tän eeʹjj Sääʹm Pride jäʹrjstet Taarr peäʹlnn
Sääʹm Pride jäʹrjstet juõʹǩǩ eeʹjj jeeʹresåʹrnn Sääʹmjânnmest. Tän eeʹjj Sääʹm Pride jäʹrjstet 11.–13.10. Taarr peäʹl Sääʹmjânnmest Bodøst, Nordlaand lääʹnest.
Lääʹdd sääʹmvuuʹdest Aanrest jäʹrjstet še jiiʹjjes Pride-noorõõttmõõžž. Aanar Pride jäʹrjstet 29.6. da tõn vieʹttjet tän eeʹjj kuälmad vuâra. Sääʹmteʹǧǧ liippad Aanar Pride cisttân Sajoozzâst nuʹt sääʹm da lääʹdd liippivuiʹm ǥu sääʹm Pride-liippin.
Sääʹmteʹǧǧ vuõlttad eeʹttkõʹsttjid nuʹt Sääʹm Pride ǥu Aanar Pride noorõõttmõõžžid.
