Laura Olsén-Ljetoff lea nammaduvvon Sámedikki ságadoalli Tuomas Aslak Juuso veahkkin
Govva: Johanna Alatorvinen/ Sámediggi
Laura Olsén-Ljetoff lea nammaduvvon ságadoalli veahkkin 10.8.2020 rájes, go Rosa-Máren Magga sirdašuvai ođđa bargui borgemánu 2020 álggus. Olsén-Ljetoff doaibmá barggus válgabaji 2020-2023 áigge ja bargá Anáris Sajosis.
Veahkki bargguide gullá veahkehit ságadoalli sutnje oaivvilduvvon bargguin. Veahkki válmmaštallá ja ovdanbuktá dárbbu mielde stivrra, sámedikki ja lávdegottiid čoahkkimis doaibmasuorgásis gullevaš áššiid ja ollašuhttá daid mearrádusaid. Hálddahushoavda nammadii Olsén-Ljetoff doaibmabadjái ságadoalli veahkkin ságadoalli evttohusa vuođul Sámedikki bargoortnega čuoggá 7 b § mielde.
Olsén-Ljetoff lea bargan Sámedikkis árabut guktii vusten jagi 2016 Nuoraidráđi Oahppoofelaš-fitnus ja jagi 2019 riikkaidgaskasaš áššiid čálli virgesadjásažžan. Ovdal go son álggahii ságadoalli veahkki doaimmas, son barggai Nuortalaškulturvuođđudusa fitnus, mii gieđahallá nuortalaččaid guollebivdui laktáseaddji árbedieđu. Lassin son lea bargan ovdal ee. Lappi universitehta Árktalaš guovddážis dutkin iešguđetlágan sámiid vuoigatvuođaide ja servodatlaš sajádahkii laktáseaddji dutkanfitnuid olis.
Oktavuođadieđut
laura.olsen-ljetoff(at)samediggi.fi
tlf. 040 617 5113
