Niina Siivikko joatká Sámedikki ságajođiheaddji veahkkebargin

Sámedikki ságajođiheaddji veahkkebargi Niina Siivikko. Govva: Sámediggi / Niina Siivikko

Sámedikki ságajođiheaddji veahkkebargin lea nammaduvvon 1.3.2024 rájes filosofiija magisttar Niina Siivikko. Sámediggi almmuhii ságajođiheaddji veahkkebargi doaimma ohcan láhkai guovvamánus. Mearreáiggi rádjai doibmii bohte guokte ohcamuša.

Hálddahushoavda nammadii ságajođiheaddji veahkkebargi Sámedikki bargoortnega 7 b § mielde. Sámedikki ságajođiheaddji veahkkebargi bargguide gullá veahkehit ságajođiheaddji politihkalaš ja hálddahuslaš bargguin. Veahkkebargi válmmaštallá ja ovdanbuktá dárbbu mielde stivrra, sámedikki ja lávdegottiid čoahkkimiin iežas doaibmasuorgái gullevaš áššiid ja ollašuhttá daid mearrádusaid.

– Lean hui movtta go beasan joatkit Sámedikkis. Ságajođiheaddji veahkkebargi bargogovva lea hui máŋggabealat, miellagiddevaš ja hástaleaddji, ja lea gudni beassat bargat fas dehálaš barggu sámeservoša ovdii, Siivikko gávnnaha.

Avvillaš Siivikko lea árabut bargan iešguđetlágan prošeavttain ee. Suoma ON-lihttui, sosiála- ja dearvvašvuođaministeriijai ja Turku universitehtii. Siivikko lea maid olmmošvuoigatvuođalihtu stivrra lahttu.

– Miellagiddevaš bargogohččosiid lassin lea hui somá beasat ruovttoluotta Sámedikki liekkus bargoservošii ja beaivválaš sámegiela geavaheapmái. Sávange ahte gávnnan Anáris fargga vistti ja beasan fárret ollásit ruovttoluotta ruoktoguvlui, Siivikko dadjá.

Siivikko sirdásii doibmii prošeaktadutki barggus 7.2. mearreáigásažžan vuos guovvamánnui rekryterenproseassa áigái. Son doaibmá ságajođiheaddji veahkkebargin doaibmabaji 2024–2027 loahpa rádjai.

Oktavuođadieđut:
Niina Siivikko
Ságajođiheaddji veahkkebargi
Tel. 044 779 1620
niina.siivikko@samediggi.fi