Nuortalaš váinniid máhcaheamis dollui čoahkkin Njellimis – Sávaldahkan livčče oažžut váinniid ruovttoluotta hávddi ráffái
Norgga Sámediggi ordnii 10.6. Njávdámis ja 11.6. Njellimis ságastallandilálašvuođaid nuortalaš váinniid máhcaheamis.
Govva: Ville Fofonoff / Sámediggi
Njellima dilálašvuhtii čoahkkanedje vádjit 20 nuortalačča ságastallat Báhčaveaijoga hávdesullos jagi 1958 roggojuvvon nuortalaš váinniid vejolaš máhcaheamis sihke ođđasit hávdádeamis.
Hávddiin roggojuvvon 21 váinni leat ovdakristtalaš áiggis 1310-logu rájes álot jagi 1925 hávdáduvvon váinniid rádjai.
Njellimis ášši ovdanbuktimin ledje Runar Myrnes Balto Norgga Sámedikkis sihke Jan Bjaalie ja Johannes Falk Paulsen Oslo universitehtas. Suoma Sámedikki dilálašvuođas ovddastii stivrra lahttu Tauno Ljetoff.
Fáttá ovdanbuktima maŋŋá ságastallama hálddašedje gažaldagat das, háliiduvvogo ahte váinnit hávdáduvvojit ođđasit ja jos háliiduvvo, de gosa ja makkár goluin. Maiddái das ságastallui, leago hállu bargat vejolaččat lasi dutkamušaid ovdal vejolaš máhcaheami. Ságastallamiin bohciidii ovdan čielga sávaldat, ahte váinnit ožžojuvvojit ruovttoluotta hávddi ráffái.
– Nuortalaččat, geat ledje báikki alde, ledje viidát dan mielas, ahte nuortalaš váinniid galggašii oažžut ruovttoluotta hávddi ráffái ja hávdádit Svanvik hávdeeatnamii seamma báikái, gosa oassi váinniin lei jo ovdal hávdáduvvon. Maiddái nuortalaš váinniid fárus hávdáduvvon dávviriid máhcaheamis ságastallui, muitala Sámedikki stivrra lahttu Tauno Ljetoff.
Norgga Sámedikkis lea mearridanváldi nuortalaš váinniid máhcaheamis
Norgga Sámediggi lea ožžon máhcahanbivdaga 21 váinnis Báhčaveaijogas (Paččjokk), Mátta-Várjjagis. Váinnit leat Báhčaveaijoga siidda (Paččjokk sijdd) ássiid ja dat leat máŋggaid čuđiid jagiid áigodagas. Báhčaveaijoga siida juohkásii stáhtaid rádjageassimiid geažil ja maŋisboahttit ásset dál Norggas, Suomas ja Ruoššas.
Nuortalaš váinnit leat dál Oslo universitehta bioantropologalaš čoakkáldagain. Norgga Sámedikkis lea, Oslo universitehtain dahkkon soahpamuša vuođul, mearridanváldi das, galgágo váinniid máhcahit, danin ahte daid sáhtášii hávdádit ođđasit. Ášši válmmaštallat lea vuođđuduvvon bargojoavku, gos leat ovddastuvvon Oslo universitehta Ä´vv Saa´mi Mu´zei, Nuortalaččaid siidačoahkkin ja Norgga Sámediggi. Bargojoavku joatká ášši válmmaštallama, vai dan sáhttá doalvut Norgga Sámedikki dievasčoahkkimii gieđahallama várás.
