Ságadoalli Juuso: “Boazovahátlága čađaheami boazodoallojagi 2021–2022 eahpedábálaš dálke- ja guohtundili dihte galgá álggahit farggamusat”
Ságadoalli Tuomas Aslak Juuso almmustahtii 19.9.2023 cealkámuša boazovahátlága heiveheamis boazodoallojahkái 2021-2022. Ságadoalli Juuso doarjala cealkámušastis dasa, ahte boazovahátláhka heivehuvvo lága vuoiŋŋa mielde boazodoallojagi 2021-2022 eahpedábálaš dálke- ja guohtundili dihte. Son evttoha, ahte ášši ovddideamis váldit bottu, ja ságastit vuđolaččat duohtaáššiid vuođul, seammás go muitit lága dárkkuhusa.
– Eana- ja meahccedoalloministeriija virgeolbmot eai čájet dáhtu heivehit boazovahátlága ja buhttet dálke- ja guohtundili dihte šaddan vahágiid boazodoallojagi 2021–2022. Sii baicce šiitet, ahte vahágat livčče leamašan eahpedábálaččat. Dát lea guhkkin eret das maid badjeolbmot leat vásihan, dadjá Sámedikki ságadoalli Tuomas Aslak Juuso.
– Vahágat leat leamašan sullii 20 miljovnna euro ja mihá unnit guovllus go ovddit goavvejagi. Boazovahátlága dárkkuhus lea buorre ja dehálaš: hállu sihkkarastit, ahte badjeolmmoš ii báze eahpedábálaš dálke- ja guohtundiliid dihte okto, muhto son bastá baicce joatkit ealáhusas. Dán dárkkuhus ii leat dál ministerija dulkojumi mielde ollašuvvame, joatká Juuso.
Boazodoallu lea vásihan oanehis áiggis guokte issoras goavvejagi
Boazodoallojagi 2021–2022 sámiid ruovttuguovllu badjeolbmot vásihedje oanehis áiggis juo nuppi eahpedábálaš hástaleaddji dálvvi. Jagi 2019–2020 goavvedálvvi dihte boazovahátlága čađaheapmi álggahuvvui áššáigullevaččat, gávnnahuvvon vahágat čielggaduvvojedje ja dat oassái maiddái buhttejuvvojedje, vaikko eai dievaslaččat.
Čuovvovaš goavvejahki lei goittotge čuovvovaš dálvve 2021–2022, go muhtin guovlluin eai lean vel oba geargan gálganit ovddit goavvejagis. Guohtun lei stuorra oasis erenomážit sámebálgosiin eahpedábálaš heittot bodneskártta ja guohppaga bilidan guohtuma dihte.
– Boazovahátláhka lea heivehuvvon boazodoallojagi 2021–2022 ektui ártegit. Eana- ja meahccedoalloministeriija logut ja daid dulkojumit leat problemáhtalaččat ja lága vuoiŋŋa vuostá, muitala Sámedikki II várreságadoalli Leo Aikio.
Luondduriggodatguovddáš gávnnahii čielggadusastis, ahte muohttaga garra ja jikŋon bodnegeardi ja guovllu šattodaga alla guohpatoksiidnasisdoallu dagahedje heajos guohtuma oasis boazodoalloguovllu dálvet 2021–2022.
Loga cealkámuša dáppe.
Lassedieđut:
Tuomas Aslak Juuso
Ságadoalli
040 687 3394
tuomas.juuso@samediggi.fi
Leo Aikio
II várreságadoalli
040 621 6505
leo.aikio@samediggi.fi
