Ságadoalli veahkki Rosa-Máren Magga sirdása ođđa bargui

Sámedikki ságadoalli veahkki Rosa-Máren Magga guođđá barggustis ságadoalli veahkkin. Magga álggaha borgemánu álggus ođđa virggis ráđđeaddin Arktalaš Ráđi Eamiálbmotčállingottis (Arctic Council Indigenous Peoples’ Secretariat). Magga lea ilolaš go lea beassan bargat ságadoalli veahkkin, muhto hálida čuovvut su niegu ja dan dihte molsu bargosaji:

– Lea leamaš fiinnis beassat bargat dán barggus ságadoalli veahkkin ja oaidnit lahka Sámedikki politihkálaš barggu. Lean maid hui giitevaš ságadoallái dán vejolašvuođas. Dávjá stuorra vejolašvuođat eallimis bohtet oktanaga. Lean goittotge mearridan čuovvut mu niegu ja váldit vuostá bargofálaldaga Arktalaš Ráđi eamiálmotčállingottis, danin go dat lea mu guhkesáigásaš niehkobargu.

Ságadoalli Tuomas Aslak Juuso dadjá, ahte Magga bargoohcanproseassa Arktalaš Ráđi čállingoddái lei dieđus Sámedikkis jo ovdalgo Magga álggahii barggustis ságadoalli veahkkin:

– Rosa-Máren muitalii dan birra rahpasit munnje ja hálddahushovdii juo ovdal su válljema ságadoalli veahkkin, nuba vejolaš barggus vuolgin lei juo dieđus. Eat dieđus livčče hálidan massit buori bargi, muhto dát lea leamaš min dieđus. Hálidan giitit su buori barggu ovddas luohtehahtti veahkkin ja sávan sutnje buot buori ja lihku ođđa bargguin.

Arktalaš Ráđi čállingoddi lea Romssas, Norggas. Magga gearggai bargat ságadoalli veahkkin cuoŋománu 2020 rájes.