Ságajođiheaddji Juuso: Alimus hálddahusrievtti čovdosat čájehit, ahte dárbbašuvvo sámediggelága ođastus
Alimus hálddahusriekti (AHR) lea addán mearrádusa jagi 2019 sámediggeválggaid válgalogahallanmerkejumiid guoski áššiin. AHR dohkkehii Sámedikki válgalogahallamii 37 olbmo vuostá Sámedikki válgalávdegotti ja stivrra mearrádusaid ja hilggui dahje guđii dutkkakeahttá oktiibuot 124 váidalusa. Sámediggi kommentere ášši almmolaš jahkegirjemearrádusaid vuođul.
Sámediggi oaivvilda, ahte AHR ii velge dievasmearálaččat gudnejahte eamiálbmot sámiid iešráđđenvuoigatvuođa, vaikke ON:id olmmošriektekomitea gávnnahii jagi 2019 olmmošriekteloavkideami Sámedikki válgalogahallamii merkema guoski AHR:a mearrádusaid oasil ja geatnegahtii Suoma divvut loavkidemiid ja fuolahit ahte dat eai šat joatkašuva boahttevuođas.
– Sámediggi oaivvilda, ahte ON:id olmmošriektekomitea čovdosiid ásahan geatnegasvuođat eai ollašuva, vaikke AHR lea váldán vuhtii olmmošriektekomitea oainnuid dulkonprinsihppan, ja vaikke lága dulkomiin lea dáhpáhuvvan vejolaččat dehálašge nuppástus sámiid iešráđđenvuoigatvuođa guvlui, dadjá Sámedikki ságajođiheaddji Tuomas Aslak Juuso.
– Alimus hálddahusrievtti ođđa mearrádusat čájehit dan, ahte bissovaš čoavddus juksojuvvo dušše rievdademiin sámediggelága, joatká Juuso.
Sámediggelága nuppástusa válmmaštalli doaibmagotti bargu lea jođus ja doaibmabadji nohká 15.5.2021.
Duogážin ON:id siviila- ja politihkalaš vuoigatvuođaid soahpamuša loavkideapmi
ON:id olmmošriektekomitea lea gávnnahan guovvamánus 2019 addin čovdosis, ahte AHR lea jagi 2011 ja 2015 mearrádusain loavkidan ON:id siviila- ja politihkalaš vuoigatvuođaid soahpamuša go dohkkehii Sámedikki válgalogahallamii olbmuid vuoigatvuođavuostásaš kriteraid vuođul. KP-soahpamuš lea okta ON:id olmmošvuoigatvuođasoahpamušain, mii lea boahtán Suomas čadnin fápmui jagi 1976.
Olmmošriektekomitea lea fuopmášahttán Suoma ain vuoigatvuođaloavkideami joatkašuvvamis jagiid 2011 ja 2015 válgalogahallamiid guoski AHR:a mearrádusaid burggekeahttá guođđináššis (7/2019). Seamma háve olmmošriektekomitea válddii sámiid vuoigatvuođaid guoski ávžžuhusaid jođálmahtton čuovvumii, ja Suopma galgá raporteret ávžžuhusaid ollašuvvamis juo njukčamánus 2022.
AHR lea leamaš diđolaš mearrádusaid barggadettiin dáid Olmmošriektekomitea cuoŋománus 2021 ovdanbuktán fuopmášumiin.
Ainjuo oassi dál addon mearrádusain goittotge joatká vuoigatvuođaloavkideami go AHR geahččá, ahte go dálá láhka lea fámus de dat lea čadnon doallat fámus dáhpáhusaid, main lea oktii mearridan, ja juoba viiddidit daid váikkuhusaid ođđa váidalusaide, vaikke dat doalvvošii sámiid vuoigatvuođaid loavkideapmái. Seamma áigge riektegeavadaga eahpeoktilašvuohta badjána, go “buhtes beavddi alde” gieđahallamii boahtti ođđa dáhpáhusain AHR goittotge dál čuovvu olmmošriektekomitea linnjádemiid.
Lassidieđut:
Tuomas Aslak Juuso
Ságajođiheaddji
040 687 3394
tuomas.juuso(at)samediggi.fi
