Ságajođiheaddji Näkkäläjärvi ON:in: Sámediggeláhkaevttohusa galgá dohkkehit jođánit - “Eai leat šat dušši ákkat”
Suoma Sámediggi oassálastá ON:id eamiálbmogiid vuoigatvuođaid áššedovdimekanismma (EMRIP) 17. čoahkkimii Geneves 8.–12.7.2024. Sámedikki ságajođiheaddji Pirita Näkkäläjärvi doarjalii iežas sáhkavuorus Suoma riikkabeivviide, ahte sámediggeláhkaevttohus dohkkehuvvo jođánit.
Eamiálbmogiid vuoigatvuođaid loavkideamit Suomas eai leat gudnin Supmii, dadjá Sámedikki ságajođiheaddji Pirita Näkkäläjärvi sáhkavuorustis. Govva: Sámediggi / Inka-Saara Arttijeff.
Suoma Sámedikki ságajođiheaddji Pirita Näkkäläjärvis ledje muitalan láhkai ON:id eamiálbmogiid vuoigatvuođaid áššedovdimekanismii sihke fuones ja buorre ođđasat. Alimus hálddahusriekti mearridii giđđat 2024, ahte sámediggeválggaid galgá ordnet ođđasit ja merket 65 olbmo válgalogahallamii, vaikke sii eai Sámedikki orgánaid mearrádusaid mielde deavdde jienastanvuoigatvuođakritearaid.
– Mii, buot čieža stivrra lahtu, leat bargan ON:id olmmošriektekomiteai AHR mearrádusain olmmošvuoigatvuođaváidalusa. Olmmošriektekomitea lea fas bivdán, ahte Suoma stáhta ii álgge mávssahit Sámedikki válgalogahallanášši dihte. Dát lea dehálaš, daningo mávssahandoaimmat leat gildojuvvon vealaheami hápmi, ságajođiheaddji Näkkäläjärvi muitala sáhkavuorustis.
Ságajođiheaddji Näkkäläjärvis ledje muitalan láhkai buorit ságat ođđasit ordnejuvvon sámediggeválggain, mat nohke mannan vahkus.
– Sápmelaččat vuite iežaset válggain! Mearkkašahtti eanetlohku Sámedikki ođđa lahtuin guottiha sámediggeláhkaevttohusa dohkkeheami. Ávžžuhange, ahte riikkabeaivvit dohkkehit nu jođánit go vejolaš láhkaevttohusa, mas leat ráđđádallan Sámedikkiin ja ovttamielaččat buktán riikkabeivviide. Šluhttemii eai leat šat dušši ákkat, deattuhii ságajođiheaddji Näkkäläjärvi sáhkavuorustis.
Oaiveministtar Petteri Orpo (olg) ráđđehus attii juovlamánus 2023 sámediggeláhkaevttohusa ovttamielalažžan riikkabeivviide. Vuođđoláhkaváljagoddi šluhttii guovvamánus 2024 sámediggeláhkaevttohusa gieđahallama ođđa sámediggeválggaid badjel.
Eamiálbmogiid vuoigatvuođaid áššedovdimekanisma čoahkkana jahkásaččat Geneves
Eamiálbmogiid vuoigatvuođaid áššedovdimekanisma (Expert Mechanism on the Rights of Indigenous Peoples, EMRIP) lea ON:id olmmošriekteráđi veahkkeorgána. Dan jahkásaš čoahkkimiidda Geneves oassálastet earret eará stáhtaid, eamiálbmogiid sihke eamiálbmotorganisašuvnnaid ovddasteaddjit. Mekanisma veahkeha lahttoriikkaid ON:id eamiálbmogiid vuoigatvuođaid julggaštusa mihttomeriid juksamis.
Lassedieđut
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi
