Sámeáššiid ráđđádallanbeivviin ovdan ee. eamiálbmogiid vuoigatvuođaid ollašuhttin Suomas
Sámeáššiid ráđđádallanbeaivvit lágiduvvojit skábmamánu 16.-17. beaivve 2020 gáiddusoktavuođaiguin. Ráđđádallanbeivviid, mat lágiduvvojit jahkásaččat, dárkkuhussan lea mannat čađa áigeguovdilis sámeáššiid ministeriijaid virgeolbmuiguin ja Sámedikki ovddasteaddjiiguin. Temát, mat leat ovdan dán jage ráđđádallanbeivviin, leat eamiálbmogiid vuoigatvuođaid ollašuhttin Suomas sihke sámegiela ja kultuvrra guoski mearreruđaid oppalašdili árvvoštallan.
Ráđđádallanbeivviid vuosttas beaivve lea buot ministeriijaide dárkkuhuvvon oktasaš oassi, gos gieđahallo eamiálbmogiid vuoigatvuođaid ollašuhttin Suoma riikkaidgaskasaš olmmošvuoigatvuođageatnegasvuođaid ja – čatnasumiid oasil. Nuppi beaivve čohkkejuvvo diehtu oppalašdilis, mii guoská erenomážit sámegiela ja -kultuvrra mearreruđaid.
“Vuorddán ráđđádallanbeivviin buori ságastallama sámiid guoski áigeguovdilis áššiin. Erenomážit lea dehálaš gieđahallat eamiálbmogiid vuoigatvuođaid ollašuhttima Suomas, dasgo Suomas ii dán rádjai leat válmmaštallon álbmotlaš strategiija iige eamiálbmogiid vuoigatvuođaid julggaštusa ollašuhttin dáhpáhuva koordinerejuvvon hámis”, muitala ságajođiheaddji Tuomas Aslak Juuso.
Ráđđádallamiid nuppi beaivve gevvo lassin ságastallan Sámedikki evttohan áigeguovdilis fáttáid birra dain vástideaddji virgeolbmuiguin. Fáddán leat kulturbálvalusat ja guovddážiid ruhtadeapmi, sápmelaččaid ealáhusbargiid sosiáladorvvu ovddideapmi ja maiddái sámegielat ja kulturmieldásaš mielladearvvasvuođabálvalusat.
Sámedikki beales ráđđádallanbeivviide oassálastet ságajođiheaddji Tuomas Aslak Juuso, I várreságajođiheaddji Anni Koivisto, II várreságajođiheaddji Leo Aikio, hálddahushoavda Pia Ruotsala-Kangasniemi sihke Sámedikki virgeolbmot sierra sektorain.
Vuoigatvuođaministeriija ja Sámediggi leat koordineren ráđđádallanbeivviid ja dat lágiduvvojit dál guđát geardde.
Lassidieđut:
Ságajođiheaddji Tuomas Aslak Juuso tel. 040 687 3394 / 010 839 3101, tuomas.juuso(at)samediggi.fi
I várreságajođiheaddji Anni Koivisto tel. 040 415 5969 , anni.koivisto(at)samediggi.fi
II várreságajođiheaddji Leo Aikio tel. 040 621 6505 / 010 839 3180, leo.aikio(at)samediggi.fi
Hálddahushoavda Pia Ruotsala-Kangasniemi, tel. 040 726 2688 / 010 839 3106, pia.ruotsala(at)samediggi.fi
