Sámediggi háliida guhkes áigge čovdosiid giellabeassedoaimma sihkkarastima várás – ii váldde giellabeassedoaimma lágideami vuollái
Sámedikki stivra gieđahalai čoahkkimis 2.-3.12.2019 kultur- ja giellabeassedoaimmas dahkkon vuoigatvuođalaš čielggadeami ja gažaldaga giellabeassedoaimma lágideamis ja buvttadeamis. Sámedikki stivra mearridii čoahkkimis plánaid birra, mat gusket sámi kultur- ja giellabeassedoaimma oanehis ja guhkes áigge ovddideami.
Sámediggi lea ožžon gárvvisin čielggadanbarggu, man váldobargun lea leamaš čielggadit mainna vugiin ja eavttuin kultur- ja giellabeassedoaimma sáhtášii sirdit Sámedikki ordnema vuollái. Dát lea váldon ulbmilin Sámedikki dán válgabaji politihkalaš doaibmanprográmmain. Maiddái Anára ja Soađegili gielddat ovttas Anarâškielâ serviin leat álgagis evttohan, ahte Sámediggi váldá kultur- ja giellabeassedoaimma lágideami vuollái.
Dat, gean vásttus sámi kultur- ja giellabeassedoaibma lea, lea okta doaimma stuorámus hástalusain. Čielggadusa mielde molssaeaktun galggašiige guorahallat hástalusaid čoavdima guhkit áigge siste sihkkarastima dihtii giellabeassedoaimma bissovašvuođa, kvalitehta ja doaibmansihkkarvuođa. Čielggadusa bohtosiin boahtá maiddái ovdan, ahte fámus leahkki árrabajásgeassinlága mielde Sámediggi ii sáhte doaibmat giellabeassebálvalusaid lágideaddjin nugo gielddat. Giellabeassedoaimma fállan gielddaide Sámedikki doaimmas eaktudivčče, ahte Sámediggi vuođđudivčče das sierranas priváhtavuoigatvuođalaš doaibmi. Čielggadeamis ovdanbukton molssaeavttut eaktudit goittotge dárkilut árvvoštallama ja lassiresurssaid.
Sámediggi lea duhtavaš giellabeassedoaimma viidumii ja dan bohtosiidda gielaealáskahttimis. Suoma stáhta doarjja giellabeassedoaimmaide lea leamaš mearkkašahtti ja lea dahkan vejolažžan dan šaddama ja buriid bohtosiid. Dál lea goittotge dárbu čielggadit makkár nuppástusaid giellabeassedoaimma stáđásmahttin eaktuda láhkaásaheapmái ja doaibmanráhkadusaide, vuoi dan buorit bohtosat boahttevuođasge šaddet sihkkarastot.
”Giellabeassedoaibma lea erenomáš dehálaš ja sávan, ahte dálá doaibmit sáhttet joatkit, dassážiigo mis leat guhkes áigge čovdosat dillái. Sávan, ahte dárbbu miel gielddat guddet vásttu giellabeassedoaimma joatkašuvvamis”, muitala Sámedikki ságajođiheaddji Tiina Sanila-Aikio.
Sámedikki stivra evttoha, ahte oassin oahpahus- ja kulturministeriija vuođđudan sámegielaid ja sámegielat oahpahusa ovddidanjoavkku, ráhkaduvvo sámi árrabajásgeassima ja sámi kultur- ja giellabeassedoaimma geaidnokárta. Geaidnokárttas meroštallošedje doaimma guhkes áigge ulbmilat ja daid eaktudan doaimmat. Seamma oktavuođas Sámedikki stivra evttoha Sámedikki jagi 2020 doaibmaplánii, ahte jotkojuvvo čielggadanbargu das, sáhttágo Sámediggi doaibmat giellabeassebálvalusaid lágideaddjin.
Govva: Ville-Riiko Fofonoff / Sámediggi
Lassidieđut:
Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi
Sámi gielladorvočálli Anne Kirste Aikio tel. 040 707 5626, anne-kirste.aikio(at)samediggi.fi
Ovdačilgehusprošeavtta plánejeaddji Piia Nuorgam tel. 040 623 3341, piia.nuorgam(at)samediggi.fi
