Sámediggi háliida ovddidit árktalaš dutkamuša Geavu dutkanstašuvnnas ovttasbarggus Turku universitehtain ja Ohcejoga gielddain

Turku universitehta stivra galledii borgemánu loahpageahčen Geavu dutkanstašuvnna, Ohcejoga gieldda sihke Sámedikki Anáris. Sihke Ohcejoga ja Anára deaivvadeamit ledje hui friijahápmásaš ja lotkes dilálašvuođat. Doppe ságastallojuvvui Geavu dutkanstašuvnna historjjás, otnábeaivvis ja boahttevuođas.Lappi dutkanlágádus Geavvu lea bálvalan dutkamuša eandalit Turku universitehtas measta čiežalogi jagi áigge. Dutkanlágádus lea universitehtii hui dehálaš, dasgo stašuvdna dahká vejolažžan ollašuhttit hui guhkes dutkanráidduid sihke máŋggadieđalaš oktasašbarggu ja deaivvademiid.

Turku universitehta lea gávcci dieđagotti sturrosaš máŋggadieđalaš universitehta, man dieđalaš intreassat ollet luonddu dutkamušas kultuvrraid dutkamuššii ja borasdávdadutkamušas servodatdiehtagiidda. Luondu rievdá davvin jođánit, danin dan dutkamuš lea aiddo dál hui krihtalaš. Seammaláhkai lea dehálaš dutkat maid davviguovllu olbmuid eallima rievdama.

Dán máŋggasuorggat dutkamuša eavttuid buorideami ja áiggi dássái bidjama várás Turku universitehta ovddida aiddo dál dutkanstašuvnna aktiivvalaččat. Stašuvnnas leat leamaš jođus viiddis huksenbarggut, dasgo universitehta investere aiddo dál stašuvnna vuođđodivvumiidda ja infrastruktuvrra ovddideapmái sullii golbma miljovnna euro.

Dutkanstašuvdna lea Turku universitehta dáfus maid máŋggaid vejolašvuođaid šaddansadji. Stašuvdna sáhtášii fállat dilálašvuođaid ovdamearkka dihte dieđaturismma ovddideapmái – go beare dutkamušdoaimma gáibádusat váldojuvvojit vuhtii. Dieđaturismma potentiála galggašii maid oaidnit gielddas oktan geasuhan- ja doalahanfápmun sihke luondduárvvuid ja sámekultuvrra dovddusvuođa lasiheaddjin.

Maiddái Sámediggi lea beroštuvvan ovddidit árktalaš dutkamuša Geavu dutkanstašuvnnas ovttas Turku universitehtain ja Ohcejoga gielddain. Dálkkádatnuppástus ja luonddujávku váikkuhit mearkkašahtti ollu sápmelaččaid buot árbevirolaš ealáhusaide. Sámeservošis lea dárbu ovdamearkka dihte dálkkádatnuppástusa vuogáiduvvanprográmmii buot árbevirolaš ealáhusaid ektui. Ovttasbargguin basttášii ovttastahttit dutkojuvvon dieđu ja árbevirolaš dieđu vuogáiduvvama vuođđun.

Ohcejoga gielddas ássi mánát ja nuorat leat ovdavuoigadahtton sajis, dasgo sii besset iežaset gielddas oahpásmuvvat diehtaga ja dutkamuša dahkamii, go beare mii rávesolbmot áddet dán potentiála. Duordnamiestagat, mat šaddet Ohcejohnjálmmi skuvlla ja Sámelogahaga šilljobirrasis, leat buorre ovdamearka das, mo oktageardánit dutkamuša sáhttá buktit oassin mánáid ja nuoraid árgga.

Oahppolágádusovttasbargu Turku universitehtain láhčá maid Sámelogahahkii vejolašvuođa ovddidit iežas oahppofálaldagaid ovdamearkka dihte árktalaš guovllu biologiijai. Danin leage fiinna ášši, ahte universitehta oaidná oktasašbarggu Ohcejoga doaibmiiguin dehálažžan. Universitehtas lea ollu addámuš, nugo omd. viiddis Rabas universitehta oahppofálaldat, ja fálaldagain ávkkástallan vaikkoba skuvlaoahpahusas lea vejolaš.

Universitehtas sávvetge, ahte oktasašbargu Ohcejoga ja ohcejohkalaš fitnodatdoalliiguin ja singuin, geain lea miehtemielalaš oaidnu fitnodatdoaimma birra, joatkašuvvá ja ahte stašuvnna doaimma sáhttá ovddidit maid báikkálaš fámuiguin.

Marjo Kaartinen, rektor, Turku universitehta
Päivi Kontio, gielddahoavda, Ohcejoga gielda
Pirita Näkkäläjärvi, ságadoalli, Sámediggi

___

Lassedieđut:
Päivi Kontio
040 744 7630
paivi.kontio@utsjoki.fi

Pirita Näkkäläjärvi
044 753 3766
pirita.nakkalajarvi@samediggi.fi