Sääʹmteʹǧǧ haaʹlad õõuʹdeed aarktlaž tuʹtǩǩummuž Kevo tuʹtǩǩeemsâjldõõǥǥâst õhttsažtuâjjan Turku universiteeʹttin da Uccjooǥǥ kooʹddin

Turku universiteeʹtt halltõs kueʹssji Kevo tuʹtǩǩeemsâjldõõǥǥâst påʹrǧǧmannu looppâst, Uccjooǥǥ kååʹdd kueʹssen di Sääʹmteeʹǧǧest Aanrest. Nuʹt Uccjooǥǥ ǥu Aanar kaaunõõttmõõžž leʹjje samai mooddai da lueʹn. Saǥstõõllmõõžž joʹtte Kevo tuʹtǩǩeemsâjldõõǥǥ historia, tän peeiʹv da pueʹttiääiʹj pirr.

Lappi tuʹtǩǩeemstrooiʹtel Kevo lij kääzzkâsttam tuʹtǩǩummuž aainâs Turku universiteeʹttest âlddsin čiččlå eeʹjj ääiʹj. Tuʹtǩǩeemstrooiʹtel lij universitetta čuuʹt ärvvsaž, tõn diõtt ǥu sâjldõk vueiʹtlvâstt kuʹǩes tuʹtǩǩeemrääidaid di määŋgtiõđlaž õhttsažtuâj da kaaunõõttmõõžžid.

Turku universiteʹtt lij kääuʹc tiõđkååʹdd jõnn, määŋgtiõđlaž universiteʹtt, koon tiõđlaž intreeʹss vuälla luâđ tuʹtǩǩummšest kulttuuri tuʹtǩǩummša da poorrikõpptuʹtǩǩummšest õhttsažkåʹddtiõttid. Luâtt muttšââvv tââʹvest jåʹttlânji, koon määinast tõn tuʹtǩǩummuš lij čuuʹt kriittlaž samai ååʹn. Seämma nalla täʹrǩǩ lij še tuʹtǩǩeed tââʹvest aassji jieʹllem mottjummuž.

Tän määŋgsuârǥlaž tuʹtǩǩeem õudldõõzzi pueʹreem da ääiʹj tässa piâssâm õuʹdde Turku universiteʹtt veekk pueʹrmõs ääiʹj tuʹtǩǩeemsâjldõõǥǥ aktiivlânji õõudårra. Sâjldõõǥǥâst lie leämmaž jååʹttmen jõnn raajâlmtuâj, tõn diõtt ǥu universiteʹtt investâstt pueʹrmõs ääiʹj nuʹt kolmm miljoon euʹrred sâjldõõǥǥ vuâđđteevvmõõžžid da infrastruktuur õõuʹdummša.

Tuʹtǩǩeemsâjldõk lij še Turku universiteeʹtt ǩiõččmest määŋgai vueiʹttemvuõđi vogga. Sâjldõk vuäitči taʹrjjeed paaiʹǩid õuddmiârkkân tiõđturiism õõuʹdummša –  ǥu pâi tuʹtǩǩeemtååim kaiʹbbjõõzzid vääʹldet lokku. Tiõđturiism potentiaal õõlǥči nuʹt še tobdsted kååʹddest õhttân ǩieʹssem- da tuõʹllʼjemviõkktuejjeeʹjen di luâttäärvai da sääʹmkulttuur tobddmõõžž lââʹzzteeʹjen.

Aarktlaž tuʹtǩǩummuž Kevo tuʹtǩǩeemsâjldõõǥǥâst õõutsââʹjest Turku universiteeʹttin da Uccjooǥǥ kooʹddin ǩeäss še Sääʹmteeʹǧǧ. Äimmõsmuuttâs da luâttjaukkmõš vaaikte miârkteeʹjen pukid säʹmmlai äʹrbbvuõđlaž jieʹllemvuõʹjjid. Sääʹmõutstõõzzâst lij tarbb õuddmiârkkân äimmõsmuttâz šiõttlõõvvâmprograʹmme puki äʹrbbvuõđlaž jieʹllemvuõʹjji ǩiõččmest. Õõutveäkka pââstčeš õhtteed tuʹtǩǩuum teâđ ja äʹrbbteâđ šiõttlõõvvmõõžž vuâđđan.

Uccjooǥǥ kååʹddest jälsteei päärnai da nuõri sââʹjj lij šiõǥǥ, tõn diõtt ǥu sij peäʹsse jiiʹjjeez kååʹddest tobdstõõttâd tiõtti da tuʹtǩǩummuž tuejjummša, ǥu pâi mij rääʹvesoummu fiʹttjep tän potentiaal. Uccjokknjääʹlm škooul da Sääʹmlookkjiškooul õõudâst åårrai tyyrn lie šiõǥǥ õuddmiârkkân tõʹst, mõõn õõutǩerddsanji tuʹtǩǩummuž vueiʹtet puʹhtted vueʹssen päärnai da nuõri aarǥâst.

Mättstrooiʹtelõhttsažtuâjj Turku universiteeʹttin rääjj še Sääʹmlookkjiškoouʹle vueiʹttemvuõđ õõuʹdeed jiiʹjjes mättʼtõõzz taʹrjjummuž õuddmiârkkân aarktlaž vuuʹd biologia årra. Tõn diõtt-i lij fiin, što universiteʹtt vuäinn õhttsažtuâj Uccjooǥǥ toiʹmmjeeʹjivuiʹm täʹrǩǩen. Universiteeʹttest lij jiânnai mii uʹvdded, mâʹte jõnn Ääv universiteeʹttest määttai taʹrjjummuš, da taʹrjjeem määttai äuʹǩǩummuš håʹt mâka škooulmättʼtõõzzâst lij vueiʹtlvaž.

Nuʹt-ba universiteeʹttest tuäivat, što õhttsažtuâjj Uccjooǥǥ da tõn ååraž põõrǥâsniiʹǩǩi da põõrǥâsmiõllsaivuiʹm juätkkai da što sâjldõõǥǥ toiʹmmjummuž vueiʹtet viikkâd õõudårra še pääiklaž viõǥǥivuiʹm.

Marjo Kaartinen, rehtor, Turku universiteʹtt
Päivi Kontio, kåʹddjååʹđteei, Uccjooǥǥ kåʹdd
Pirita Näkkäläjärvi, saaǥǥjååʹđteei, Sääʹmteʹǧǧ
___

Lââʹssteâđ:

Päivi Kontio
040 744 7630
paivi.kontio@utsjoki.fi

Pirita Näkkäläjärvi
044 753 3766
pirita.nakkalajarvi@samediggi.fi