Sámediggi loktii ON:in ovdan AHR mearrádusaid ja joatkašuvvi olmmošriekteloavkidemiid

Sámedikki ságadoalli Pirita Näkkäläjärvi doalai  mánnodaga 15.4. sáhkavuoru, mas loktii ovdan Sámedikki válgalogahallamii laktáseaddji olmmošriekteloavkidemiid, ja čujuhii maiddái Alimus hálddahusrievtti mearrádusaide lasihit 65 olbmo válgalogahallamii Sámedikki orgánaid mearrádusaid vuostá ja ordnet ođđasit jagi 2023 sámediggeválggaid.

– Suoma Sámedikki oaidnu lea čielggas. AHR ođđasamos mearrádusat loavkidit fas oktii Suoma sápmelaččaid iešmearridanrievtti eamiálbmogin ja riikkaidgaskasaš olmmošriektesoahpamusaid. Mii ávžžuhit Suoma divvut sámediggelága nu johtilit go vejolaččat olmmošriekteloavkidemiid loahpaheapmin, dajai Näkkäläjärvi sáhkavuorustis. 

Ságadoalli Näkkäläjärvi dadjá, ahte olbmuid, geat eai deavdde jietnavuoigatvuođa kriteraid, lasiheapmi Sámedikki válgalogahallamii lea sápmelaččaid assimileren váldoálbmogii.

–- AHR mearrádusat ledje beahttašupmi, dasgo eamiálbmogiid assimilerenpolitihkka ii leat dálá áigi. Sámediggi ii goittotge áiggo vuollánit. Lei dehálaš beassat raporteret dilis rábášnaga  ON:ide. Mii leat vealgi sihke iežamet álbmogii ja buot máilmmi eamiálbmogiidda dan, ahte joatkit sápmelaččaid iešmearridanrievtti bealušteami, ságadoalli Näkkäläjärvi dadjá. 

 Sámedikki stivra lea analyseremin AHR mearrádusaid ja mearrida vejolaš joatkadoaimmain maŋŋelabbos. 

Sámedikki delegašuvdnii ON:id eamiálbmogiid bissovaš forumas gullo ságadoalli lassin riikkaidgaskasaš áššiid čálli Inka Saara Arttijeff. Lassin nuoraidráđi ovddasteaddjin leat nuoraidráđi ságadoalli Rosa-Máren Juuso ja várreságadoalli Helmi Ljetoff.

Ságadoalli Näkkäläjärvi lea hupmamen máŋgga siidodáhpáhusas, dego 18.4. ordnejuvvon dilálašvuođas Eamiálbmogiid ovddasteddjiid ja institušuvnnaid beavttálmahtton oassálastima ovddideapmi ON:in (Way forward with the enhanced participation of the Indigenous Peoples’ representatives and institutions in the UN) ja 18.4. ordnejuvvon dilálašvuođas Sámiid vásáhusaid juohkin: Eamiálbmogiid jietna dálkkádatmuddendutkamušas (Sharing Sámi Experiences: Indigenous Voices on Climate Intervention Research). 

ON:id eamiálbmogiid bissovaš forum lea jahkásaš dáhpáhus

ON:id eamiálbmogiid bissovaš forum (The United Nations Permanent Forum on Indigenous Issues, UNPFII) lea jagi 2000 vuođđuduvvon ON:id ekonomiija- ja sosiálaráđi (Economic and Social Council, ECOSOC) vuollásaš ráđđeaddi doaibmaorgána, masa gullet 16 iehčanas áššedovdilahtu. Ráđđehusat nammadit gávcci lahtu ja eamiálbmogat gávcci lahtu.

Foruma bargun lea bajidit ságastallamii eamiálbmogiid guoski gažaldagaid erenomážit ekonomalaš ja sosiálalaš ovdáneami, kultuvrra, birasgažaldagaid, skuvlejumi, dearvvasvuođa ja olmmošrivttiid suorggis. Bissovaš forum addá ávžžuhusaid ja doaibmá guovddáš foruman stáhtaid, eamiálbmogiid ja ON:id spesiálaorganisašuvnnaid gaskasaš dialogiija várás. Dat čoahkkimastá oktii jagis ON:id váldobáikkis New Yorkis.

UNPFII Twenty-Third Session: 15-26.4.2024
Theme: Enhancing Indigenous Peoples’ right to self-determination in the context of the United Nations Declaration on the Rights of Indigenous Peoples: emphasizing the voices of Indigenous youth 

Lassedieđut: 
Pirita Näkkäläjärvi
Ságadoalli
044 753 3766
pirita.nakkalajarvi@samediggi.fi  

Inka Saara Arttijeff
Riikkaidgaskasaš áššiid čálli
050 574 7629 / 010 839 3198
inka-saara.arttijeff@samediggi.fi