Sámediggi ohcá nuortalašgiela mearreáigásaš giellabargi-jorgaleaddji
Sámediggi almmuha ohcan láhkai nuortalašgiela mearreáigásaš giellabargi-jorgaleaddji barggu. Bargu álgá soahpamuša mielde njukčamánus 2025. Mearreáigásaš bálvalangaskavuođa bistu lea 4 mb dahje guhkit, bálvalangaskavuođa bargoáigeproseantta mielde.
Giellabargi-jorgaleaddji bargun lea dikšut nuortalašgiela jorgalan- ja terminologiijabargguid gielladoaimmahagas. Giellabargi-jorgaleaddji gelbbolašvuođagáibádussan lea bargui heivvolaš allaskuvladutkkus dahje eará skuvlejupmi. Dan lassin jorgaleaddji gelbbolašvuođagáibádussan lea lágas auktoriserejuvvon jorgaleaddjiin (1231/2007) dárkkuhuvvon vuoigatvuohta doaibmat auktoriserejuvvon jorgaleaddjin suomagielas nuortalašgillii dahje nuppegežiid.
Barggus čuvvojuvvo guovtte mánotbaji geahččalanáigi.
Barggu bálká mearrašuvvá Sámedikki bálkávuogádaga gáibádusdási IV/IV dahje V/II mielde (vuođđobálká 2810,27–2697,63 euro/mb). Vuođđobálkká lassin barggus máksojuvvojit 24 % sámeguovllu lassi, go bargá sámiid ruovttuguovllus, ja ahkelasit, mat mearrašuvvet bargohárjánumi mielde.
Friijahápmásaš ohcanreivve ja vejolaš ánsologahallama ja eará čuvvosiid ja duođaštusaid galgá doaimmahit Sámedikki čállingoddái 2.3.2025 rádjai dán ohcamusskovi bokte (rahpasa ođđa ruvttui): Ohcanskovvi
Lassedieđuid barggus addá Sámedikki gielladorvočálli Anne Kirste Aikio tel. +358 40 707 5626 dahje anne-kirste.aikio@samediggi.fi.
Sámedikki doaimmaide sáhttá oahpásmuvvat neahttačujuhusas www.samediggi.fi.
11.2.2025
Sámediggi
