Sámedikki ortniiduvvančoahkkin dollojuvvo Anáris 23.9.2024

Sámedikki bargoortnega 55 §:a mielde ođđa Sámedikki vuosttas čoahkkima bovde čoahkkái lahttu, gii lea doaibman guhkimus áigge Sámedikki lahttun. Doaibmabadjái 1.9.2024–31.12.2027 ásahuvvon Sámedikki vuosttas čoahkkima čoahkkáibovdejeaddjin doaibmá Anne Nuorgam. Čoahkkáibovdejeaddji mearrádusa mielde Sámedikki ortniiduvvančoahkkin dollojuvvo 23.9.2024 dmu 10 rájes Sajosis, Anáris. Čoahkkin joatkašuvvá dárbbu mielde 24.9.2024.

Ortniiduvvančoahkkimis Sámediggi vállje gaskavuođastis ságajođiheaddji ja guokte várreságajođiheaddji, ásaha stivrra, áššedovdilávdegottiid sihke eará doaibmaorgánaid ja gieđahallá Sámedikki válgabaji doaibmaprográmma 2024–2027.

Sámedikki čoahkkin ovddasta Sámedikki bajimuš mearridanválddi. Dat čoahkkana 4–5 geardde jagis. Čoahkkimat leat almmolaččat ja daid sáhttá čuovvut báikki alde parlameantasáles dahje Zoom-webinaari bokte. Parlameantasáles tulkonrusttegat leat guldaleaddjiid geavahusas. Njuolggo sáddaga bokte lea vejolaš guldalit tulkojuvvon giela sáles geavahuvvon giela lassin. Sámedikki dievasčoahkkimat tulkojuvvojit suomagillii ja maiddái buot Suomas ealli sámegielaide, nuortalaš-, anáraš- ja davvisámegillii. Čoahkkináššebáhpárat gávdnojit dokumeanttain dáppe.

Lassidieđut:
Pia Ruotsala-Kangasniemi
Hálddahushoavda
010 839 3106 / 040 726 2688
pia.ruotsala@samediggi.fi