Sääʹmteeʹǧǧ noorõõttâmsåbbar ââʹnet Aanrest 23.9.2024
Tåimmpââjas 1.9.2024–31.12.2027 šiõttuum sääʹmteeʹǧǧ riâššõõttâmsåbbar ââʹnet 23.9.2024 Sajoozzâst, Aanrest. Sååbbar älgg čiâss 10.
Sääʹmteeʹǧǧ tuâjjriâššmõõžž 55 § mieʹldd ođđ sääʹmteeʹǧǧ vuõssmõs såbbar kåčč õʹhtte kuuʹǩǩmõsân sääʹmteeʹǧǧ vuäzzliʹžžen toiʹmmjam vuäzzlaž. Tåimmpââjas 1.9.2024–31.12.2027 šiõttuum Sääʹmteeʹǧǧ vuõssmõs såbbar õʹhttekåččjen toiʹmmai Anne Nuorgam. Õʹhttekåččai tuʹmmstõõǥǥ meâldlânji Sääʹmteeʹǧǧ riâššõõttâmsååbbar lij 23.9.2024 čiâss 10 ääʹljeeʹl Sajoozzâst, Aanrest. Sååbbar juätkkai taarb mieʹldd 24.9.2024.
Riâššõõttâmsåbbrest Sääʹmteʹǧǧ vaʹlljad kõskkvuõđstes saaǥǥjååʹđteei da kuõʹhtt väärrsaaǥǥjååʹđteei, šiõttad halltõõzz, äʹšštobddiluʹvddkooʹddid di jeeʹres tåimmorgaanid da ǩiõttʼtââll Sääʹmteeʹǧǧ vaalpââʹj toiʹmmjemprograamm 2024–2027.
Sääʹmteeʹǧǧ sååbbar eeʹttkâstt Sääʹmteeʹǧǧ pââimõs tuʹmmeemvääʹld. Tõt noorââtt 4–5 vuâra eeʹjjest. Såbbar lie õlmmâz da tõiʹd pâstt seuʹrrjed pääiʹǩ âʹlnn parlameʹnttpääiʹǩest leʹbe Zoom-webinaar pääiʹǩ. Parlameʹnttpääiʹǩest tuʹlǩǩeemneävv lie seuʹrrjeeʹji ââʹnnmest. Vuõigg vuõlttõõzz mieʹldd vuäitt kulddled tuʹlǩǩuum ǩiõl pääiʹǩest kullum ǩiõl lââʹssen. Sääʹmteeʹǧǧ tiuddsåbbar tuʹlǩǩeet lääddas di koolm Lääʹddjânnmest jieʹlli sääʹmǩiõlid (nuõrtt-, aanar- da tâʹvvsääʹmm). Sääʹmteeʹǧǧ sååbbaräʹššǩeeʹrj käunnʼje dokumeeʹntin tääiʹben.
Lââʹssteâđ :
Pia Ruotsala-Kangasniemi
Vaaldâšmjååʹđteei
010 839 3106 / 040 726 2688
pia.ruotsala@samediggi.fi
