Sámedikki skuvlenčállin Bigga-Helena Magga
Sámedikki dievasčoahkkin válljii čoahkkimis 24.2.2023 skuvlenčálli virgái Guhtur Niillas Juhána Bigga, Bigga-Helena Magga. Magga lea doaibman skuvlenčálli virgesadjásažžan jagi 2023 álggu rájes.
Bigga-Helena Magga. Govva: Johanna Alatorvinen / Sámediggi.
Skuvlenčálli doaibmá skuvlen- ja oahppomateriáladoaimmahaga hoavdan ja skuvlen- ja oahppamateriálalávdegotti áššemeannudeaddjin ja čállin. Bigga-Helena Magga joatká skuvlenčálli doaimmas ja vuordá beroštumiin vejolašvuođaid ja hástalusaid maid bargu mielddisbuktá.
–Lea somá beassat ovddidit skuvlenáššiid ja fuolahit skuvlamáilmmis sámi oaidninčiegas. Sámediggi sáhttá váikkuhit oahppanpolitihkalaš linnjemiidda nu báikkálaš go maid riikkaviidosaš oahppoplánaide, dadjá Magga.
Bigga-Helena Magga lea árabut bargan Sámedikkis oahppomateriálabargin ja Sámi giellagáldu davvisámegielat giellabargin. Sus lea bargohárjánupmi maiddái oahpaheaddji bargguin ja hovdenhárjánupmi prošeavttain ja rektora barggus. Jagi 2023 álggu rájes Magga lea doaibman skuvlenčálli virgesadjásažžan.
Sámediggi almmustahtii ohcan láhkai skuvlenčálli virggi ođđajagimánus seammás go guhkesáigásaš skuvlenčálli Ulla Aikio-Puoskari sirdašuvai Sámiid duohtavuođa- ja soabadankomišuvnna váldočálli doibmii. Skuvlenčálli virgái bohte oktiibuot njeallje ohcamuša, ja Sámedikki stivra jearahalai ohcciid čoahkkimis 10.2.2023.
Jearahallamiid maŋŋá Sámedikki stivra mearridii ovttajienalaččat evttohit dievasčoahkkimii Bigga-Helena Magga skuvlenčálli virgái. Magga válljejuvvui jienasteami maŋŋá: dievasčoahkkin jienastii Magga ja Petra Kuuva, guhte lei maid ohcan virggi, gaskkas. Magga namuhuvvui virgái jienaiguin 11–5.
Lassedieđut
Bigga-Helena Magga
vs. Skuvlenčálli
010 839 3121 / 040 570 2786
bigga-helena.magga(at)samediggi.fi
Pia Ruotsala-Kangasniemi
Hálddahushoavda
010 839 3106 / 040 726 2688
pia.ruotsala(at)samediggi.fi
