Sääʹmteeʹǧǧ škooultõspiisren Bigga-Helena Magga
Sääʹmteeʹǧǧ tiuddsååbbar vaʹllji såbbreʹstes 24.2.2023 škooultõspiisar vergga Guhtur Niillas Juhána Bigga, Bigga-Helena Magga. Magga lij tåimmam škooultõspiisar veeʹrjsâjjsiʹžžen eeʹjj 2023 aalǥâst.
Bigga-Helena Magga. Snimldõk: Johanna Alatorvinen/ Sääʹmteʹǧǧ.
Škooultõspiisar tåimm Škooultõs- da mättmateriaalkonttâr tuâjjlažjååʹđteeʹjen di škooultõs- da mättmateriaal-luʹvddkååʹdd ouʹddepuʹhttjen da piisren. Bigga-Helena Magga juätkk škooultõspiisar tuâjast vueʹrdeeʹl pueʹrr miõlin tuâj puʹhttem vueiʹtlvažvuõđid da vaʹǯǯtõõzzid.
–Lij hääʹsǩ piâssâd ooudâs viikkâd škooultõsaaʹššid da ââʹnned huõl škooulmaaiʹlmest sääʹm ǩiõččâmvueʹjjest. Sääʹmteʹǧǧ vuäitt vaaikted mättjempoliittlaž linjjõõzzid nuʹt pääiklaž ǥu väʹlddkååddlaž mättʼtemplaanid, särnn Magga.
Bigga-Helena Magga lij ääiʹjab leämmaž Sääʹmteeʹǧǧest mättmateriaaltuâjliʹžžen di Sääʹm ǩiõllkaʹlddi tâʹvvsääʹmǩiõl ǩiõlltuâjjliʹžžen. Suʹst lij tuâjjǩiõččlâsttmõš še uʹčteeʹl tuâjain di jååʹđtemtoobdâlm projeeʹktin di rehtor tuâjast. Eeʹjj 2023 ääʹljeeʹl Magga lij tåimmam škooultõspiisar veeʹrjsâjjsiʹžžen.
Sääʹmteʹǧǧ iʹlmmti ooccâmnalla škooultõspiisar veeʹrj ođđeeʹjjmannust kuʹǩesäiggsaž škooultõspiisar Ulla Aikio-Puoskari seerdeen Säʹmmlai tuõttvuõtt- da suåvâdvuõttkomissio väʹlddpiisar tuõjju. Škooultõspiisar vergga pueʹtte nellj ooccmõõžž, da Sääʹmteeʹǧǧ halltõs mâinstõõʹtti ooccjid såbbreʹstes 10.2.2023.
Mainstâttmõõžži mâŋŋa Sääʹmteeʹǧǧ halltõs tuʹmmji õõutmiõllsânji eʹtǩǩeed tiuddsåbbra Bigga-Helena Magga škooultõspiisar vergga. Magga vaʹlljeeš jiõnstummuž mâŋŋa: tiuddsååbbar jiõnsti Magga da veeʹrj ooccâm Petra Kuuva kõõsk. Magga nõõmteš vergga jiõnin 11–5.
Lââʹssteâđ
Bigga-Helena Magga
vs. Škooultõspiisar
010 839 3121 / 040 570 2786
bigga-helena.magga(at)samediggi.fi
Pia Ruotsala-Kangasniemi
Vaaldâšmjååʹđteeʹjj
010 839 3106 / 040 726 2688
pia.ruotsala(at)samediggi.fi
