Sámedikki stipeanda guđa allaskuvlastudentii

Oula Järvensivu, Paula Rauhala, Minna Länsman, Rauna Saijets, Ida Maria Helander ja Jonna Kesti ožžot dán jagi Sámedikki allaskuvlastudeanttaid stipeanddaid. Sámediggi almmuhii golggotmánu 12. beaivve ohcan láhkai oktiibuot guhtta 500 euro stipeandda, mat ledje oaivvilduvvon sámegiela ja/dahje sámekultuvrra váldoávnnas- ja oalgeávnnasstudeanttaide ja oahppiide geat leat alitdási oahpuin, mat válbmejit sámegielat bargoeallimii.

Stipeandaohcamušat bohte oktiibuot gávcci. Stipeanddaid ohcanáigi nogai 11. skábmamánu. Skuvlen- ja oahppamateriálalávdegoddi mearridii stipeanddaid juohkimis coahkkimisttis 25.11.

Oula Järvensivu studere Oulu universitehtas ja su váldoávnnas lea davvisámegiella. Paula Rauhala studere Norgga Árktalaš universitehtas Romssas Indigenous Studies -oahpuid. Minna Länsman studere Oulu universitehtas, su váldoávnnas lea sámiid kultuvra ja oalgeávdnasat leat davvisámegiella ja museologiija. Rauna Saijets studere davvisámegiela ja sámi girjjálašvuođa Sámi allaskuvllas Guovdageainnus. Ida Maria Helander studere sámiid kultuvrra ja davvisámegiela Oulu universitehtas. Jonna Kesti studere sosionomaoahpuid Lappi ámmátallaskuvllas Giemas.

Sámediggi giitá buot stipeandaohcciid ja sávvá juohkehažžii lihku ja menestumi oahpuin ja boahttevaš bargoeallimis.