Sámenuoraid dáiddadáhpáhus ordnejuvvo 50. háve - ávvoplakáhta duddjon eanodatlaš oahppi
Sámenuoraid dáiddadáhpáhusa ordnemis vástidit dál Sámedikki guovddážat. Filbmaguovddáš Skábma, mánáidkulturguovddáš Mánnu ja Sámemusihkkaguovddáš leat bargamin 50. sámenuoraid dáiddadáhpáhusa ordnemiin.
Sámenuoraid dáiddadáhpáhus lea erenomáš, servodaga oktasaš dáhpáhus, mii čalmmustahttá sámemánáid- ja nuoraid dáiddalaš čehppodaga. Guovddážat fuolahit dáhpáhusa ordnenbargguin ja mánát ja nuorat buvttadit sisdoalu. Dáiddadáhpáhus lea fas dáhpáhus, mii johtá miehtá sámiid ruovttuguovllu ja dán jagi dat ordnejuvvo miessemánu 19. beaivve Gáregasnjárggas.
Sámemánáid ja -nuoraid leat hálidan juo áibbas dáiddadáhpáhusa álggus hástit mielde dáiddalaš plánemii ja ovdanbuktimii. Okta vuohki fátmmastit oahppiid leamašan govvaevttohusa duddjon dáiddadáhpáhusa plakáhtii. Plakáhta lea dáhpáhusa gulahallama dehálaš oassi ja govas lea stuorra mearkkašupmi maiddái ieš dáiddárii, ulbmiljovkui ja dáhpáhusa diehtojuohkimii. Plakáhtta galggai govvet dáhpáhusa luonddu ja nuoraid ovttastallama dáiddarikkis dáhpáhusas.
Teknihkka lei friija ja evttohusat bohte oktiibuot logi. Evttohusain válljejuvvui jagi 2026 dáiddadáhpáhusa plakáhtan eanodatlaš 5. -luohkkálaš Elli Kotavuopio ivdnás, filtapeannaiguin sárgojuvvon govva. Govva lea girjját ja heive govvidit Sámenuoraid dáiddadáhpáhusa, mii lea dego hearvabáttiiguin čiŋahuvvon oktasaš dáiddaduodji. Juohke jagi nuorat lasihit ođđa ivdnás hearvabátti sámemánáid ja -nuoraid dáiddamáilbmái. Kotavuopio bálkkašuvvo dáiddamateriálapáhkain.
Lassedieđut
Minna Lehtola
044 902 9295
minna.lehtola@samediggi.fi
Petra Biret Magga-Vars
040 732 5503
petra.magga@samediggi.fi
Tarja Porsanger
050 569 6065
tarja.porsanger@samediggi.fi
