Sámi dálkkádatráđđi ásahuvvui vuosttas háve
Sámi dálkkádatráđđi lea ođđa, sorjjasmeahttun áššedovdiorgána, mii doarju sámi árbevirolaš dieđu vuhtiiváldima mearrádusbargamis, mii laktása dálkkádatpolitihkkii. Stáhtaráđđi ásahii borgemánu 24. beaivve sámi dálkkádatráđi njealje jagi áigodahkii.
Sámediggi bivddii miessemánus 2023 sámeservošis evttohusaid sámi árbevirolaš dieđu hálddašeaddjiin sámi dálkkádatráđđái. – Háliidan giitit buohkaid, geat leat ovdanbuktán evttohusaid ja eandalii daid, geat leat lohpidan vuolgit fárrui ovddidit sámi árbevirolaš dieđu vuhtiiváldima. Giittán maiddái ráđi ságajođiheaddjin nammaduvvon Klemetti Näkkäläjärvi, guhte lea geavahan olu áiggi ášši ovddideapmái ja buktán iežas áššedovdamuša maiddái Sámedikki dievasčoakkáma geavahussii, dadjá Sámedikki ságajođiheaddji Tuomas Aslak Juuso.
Sámi dálkkádatráđđái nammaduvvojedje 12 ovddasteaddji. Ráđis leat mielde sámi árbevirolaš dieđu hálddašeaddjit ja maiddái ovddastus dehálaš dieđasurggiin. Ságajođiheaddjin nammaduvvui dutkidoavttir Klemetti Näkkäläjärvi Oulu universitehtas.
– Dál ásahuvvon sámi dálkkádatráđđi lea mearkkašahtti nu sisriikkalaččat go maiddái riikkaidgaskasaččatge. Giittán erenomážit Krista Mikkonen ja Maria Ohisalo buori ja beaktilis oktasašbarggus ášši ovdii, joatká vel Juuso.
Sámi dálkkádatráđi birra ásahuvvo ođđa dálkkádatlágas
Sámi dálkkádatráđi birra ásahuvvo ođđa dálkkádatlága (423/2022) 21 §:s ja lága vuođul addojuvvon ásahusas (435/2023). Stáhtaráđđi ásaha sámi dálkkádatráđi ságajođiheaddji ja lahtuid njealje jahkái ain hávil.
Sámi dálkkádatráđi bargun lea addit cealkámušaid dálkkádatpolitihka plánain sámekultuvrra ovddideami oasil. Dálkkádatráđđi sáhttá bargat dálkkádatnuppástussii ja maiddái sámekultuvrii ja vuoigatvuođaide laktáseaddji diehtovuođu buvttadeami guoski earáge doaimmaid. Sámi dálkkádatráđđi mearrida čoakkámiin ja doaimmain iehčanasat dálkkádatlága ja stáhtaráđi ásahusa vuođul.
– Sávan, ahte dálkkádatráđi bargu beassá bures johtui ja resurssat, mat dárbbašuvvojit dasa, gávdnojit. Lea dehálaš, ahte dálkkádatnuppástusa váikkuhusat árbevirolaš sámi ealáhusaide bohtet viidát ovdan, Juuso gávnnaha.
Sámi dálkkádatráđis leat ságajođiheaddji, várreságajođiheaddji ja dan lassin eanemustá logi eará lahtu. Uhcimustá bealli dálkkádatráđi lahtuin galget leat sámi árbevirolaš dieđu hálddašeaddjit sámiid ruovttuguovllu sierra guovlluin ja vejolašvuođaid mielde sierra giellajoavkkuin. Dálkkádatráđi eará lahtut galget ovddastit birasdiehtagiid dehe juo dálkkádatráđi bargguid dáfus eará guovddáš dieđasurggiid.
Sámi dálkkádatráđi lahtut 1.9.2023-31.8.2027:
Sámi árbevirolaš dieđu hálddašeaddjit
Esko Aikio (Ohcejohka)
Petra Biret Magga-Vars (Soađegilli)
Antti-Oula Juuso (Eanodat)
Raija Lehtola (Anár)
Tuomas Semenoff (Anár)
Jussa Seurujärvi (Anár)
Dieđasurggiid ovddasteaddjit
Klemetti Näkkäläjärvi (Oulu universitehta, ságajođiheaddji)
Hilppa Gregow (Dálkediehtaga lágádus)
Rauna Kuokkanen (Lappi universitehta)
Päivi Meriläinen (Dearvvasvuođa ja buresveadjima lágádus)
Markku Ollikainen (Suoma dálkkádatpanela).
Henni Ylänne (Nuorta-Suoma universitehta)
Lassidieđut:
Tuomas Aslak Juuso
Ságajođiheaddji
040 687 3394
tuomas.juuso@samediggi.fi
Stáhtaráđđi ásahii sámi dálkkádatráđi| valtioneuvosto.fi
Sámediggi bivdá nammadanevttohusaid sámi dálkkádatráđi lahttun| samediggi.fi
