Soađegili gielda ja Sámediggi deaivvadedje jahkásaš ovttasbargobeaivvis
Soađegili gieldda ja Sámedikki ovddasteaddjit deaivvadedje 15. čakčamánu 2025 háleštit oktasaš ovdduidgohcima ja ovttasbarggu birra. Deaivvadeami ulbmilin lei nannet gulahallama ja dovdát oktasaš ovdduidgohcima čuozáhagaid. Ovttasbargobeivviid áigot joatkit jahkásaččat.
Govva: Ville Fofonoff/Sámediggi
Deaivvadeamis gávnnahedje oktasaš ovdduidgohcindárbbu, dorvvastit sámegiel árrabajásgeassima ja oahpahusa ruhtadeami. Dan lassin deaivvadeamis ságastalle sihke Soađegili gildii ja Sámediggái dehálaš ja áigeguovdilis áššiin, nugo:
- buriid álbmotgaskavuođaid ovddideapmi,
- sámi mánáidkulturguovddáš Mánu doaibma,
- eatnangeavahan- ja ealáhusgažaldagat, ja
- áššit mat gusket sámegielaid, skuvlejumi, buresveadjima ja nuoraid.
Sámedikki ságadoalli sadjásaš Tuomas Aslak Juuso deattuha man dehálaččat ovttasbargobeaivvit leat.
– Leat oaidnán ahte sámiid ruovttuguovllu gielddaiguin ordnejuvvon ovttasbargobeaivvit leat leamašan buorre vuohki gulahallat ja háleštallat oktasaš ovdduidgohcináššiin, dadjá Sámedikki ságadoalli sadjásaš Tuomas Aslak Juuso.
–Mis lei buorre ovttasbargodeaivvadeapmi Sámedikkiin. Beasaimet háleštit rahppasit ja buorre vuoiŋŋas ja gieđahalaimet dehálaš áššiid, nugo buresveadjin- ja čuvgehusbálvalusaid ovddideami, eallinfámu ja oktasaš ovdduid sámeguovllu gielddaid gaskkas. Dan ovttasbarggu lea dehálaš joatkit vai olahit min oktasaš joksanmeriid, lohká Soađegili gielddahoavda Jari Rantapelkonen.
Dán jagi deaivvadeapmi ordnejuvvui gáiddusoktavuođain. Čoahkkimis ledje mielde Soađegili gielddas gielddahoavda Jari Rantapelkonen ja buresveadjin- ja čuvgehushoavda Antti Palomaa. Sámedikki beales čoahkkimii serve ságadoalli sadjásaš Tuomas Aslak Juuso ja hálddahushoavda Pia Ruotsala-Kangasniemi ja iešguđet doaibmasurggiid virgeolbmuin skuvlenčálli Bigga-Helena Magga, gielladorvočálli Anne Kirste Aikio, giellabeassejođiheaddji Niina Aikio-Siltala, sámi mánáidkulturguovddáža doaimmajođiheaddji Petra Biret Magga-Vars, láhkačálli Kalle Varis, ealáhus- ja birasláhkačálli Sarita Kämäräinen, vs. birasčálli Leena Niska, ealáhusčálli Laura Olsén-Ljetoff, vs. sosiála- ja dearvvasvuođačálli Anni Koivisto, vs. nuoraidčálli Saana Aikio ja dieđihančálli Johanna Alatorvinen.
Sámedikki ja Soađegili gieldda ovttasbargodeaivvadeapmi gullá jahkásaš gieldaovttasbargodeaivvademiide. Seamma sullasaš deaivvademiid leat doallan dán jagi jo Ohcejoga ja Anára gielddaiguin. Deaivvadeami Eanodaga gielddain leat plánemin.
Lassedieđut:
Tuomas Aslak Juuso
Ságadoalli sadjásaš
040 687 3394
tuomas.juuso@samediggi.fi
Jari Rantapelkonen
Soađegili gielddahoavda
040 615 9880
jari.rantapelkonen@sodankyla.fi
