Vuoigatvuođaministeriija ásahii sámediggelága nuppástusa válmmaštalli doaibmagotti
Vuoigatvuođaministeriija lea ásahan sámediggelága nuppástusa válmmaštalli doaibmagotti. Doaibmagotti bargun lea válmmaštallat dárbbašlaš nuppástusaid sámedikkis addojuvvon láhkii. Doaibmagotti doaibmabadji lea 1.12.2020-15.5.2021.
Sámediggi nammadii vihtta lahtu ja sidjiide várrelahtuid sámediggelága nuppástusa válmmaštalli doaibmagoddái suoidnemánus 2020. Nammaduvvon lahtut leat Tuomas Aslak Juuso, Anne Nuorgam, Pirita Näkkäläjärvi, Martin Scheinin ja Kalle Varis sihke várrelahtut Juha-Petteri Alakorva, Anni Koivisto, Veikko Feodoroff, Piia Nuorgam ja Sarita Kämäräinen. Lassin Siiri Jomppanen nammaduvvui doaibmagoddái Sámedikki beales áššedovdin.
– Lea duođaige dehálaš, ahte sámediggeláhka ođasmahttojuvvo eamiálbmotvuoigatvuođaid vuođul. Lea buorre, ahte oažžut barggu dál johtui, dadjá Sámedikki ságajođiheaddji Tuomas Aslak Juuso.
Ráđđehusbellodagat leat iešguhtege nammadan ovtta lahtu ja várrelahtu doaibmagoddái:
| Bellodat | Lahttu | Várrelahttu |
| Suoma Sosiálademokráhtalaš bellodat | Raimo Piirainen | Mikkel Näkkäläjärvi |
| Suoma Guovddáš | Juha Joona | Eeva-Maria Maijala |
| Ruoná Lihttu | Jenni Pitko | Mirka Soinikoski |
| Gurutlihttu | Veronika Honkasalo | Anni-Sofia Niittyvuopio |
| Suoma ruoŧŧelaš álbmotbellodat | Eva Biaudet | Mats Löfström |
Doaibmagotti ságajođiheaddjin doaibmá vuoigatvuođaministeriija kansliijahoavda Pekka Timonen, nubbin áššedovdin vuoigatvuođaministeriija ossodathoavda, bajimuš hoavda Johanna Suurpää sihke čállin ráđđádalli virgeolmmoš, njunušgoddehoavda Johanna Hautakorpi ja ráđđádalli virgeolmmoš Yrsa Nyman vuoigatvuođaministeriijas.
Doaibmagotti bargun lea válmmaštallat dárbbašlaš nuppástusaid sámedikkis addon láhkii. Doaibmagotti barggu vuođđun leat vuođđovuoigatvuođat ja vuođđolága ásahan eará geatnegasvuođat, Suoma čadni riikkaidgaskasaš olmmošvuoigatvuođasoahpamušat, ON:id eamiálbmogiid vuoigatvuođaid julggaštus sihke eará vuoigatvuođa ja riikkaidgaskasaš vuoigatvuođa ovdáneapmi sihke maŋimuš áigge čovdosat.
Duogáš
- Vuoigatvuođaministeriija ásahii 13.1.2020 bargojoavkku ovdaválmmaštallat sámediggelága rievdadeami válmmaštalli doaibmagotti barggu. Bargojoavkku čoaggin diehtu ja fuopmášumit leat čohkkejuvvon muittuhančállagii. Bargojoavkku doaibmabadji nogai 31.2.2020.
- Oaiveministtar Sanna Marin ráđđehusprográmma mielde bargu sámediggelága ođasmahttima várás jotkojuvvo. Ráđđehusprográmma mielde ráđđehus gudnejahttá ja ovddida buot sápmelaččaid gielalaš ja kultuvrralaš vuoigatvuođaid ollašuvvama vuhtii váldimiin riikkaidgaskasaš soahpamušaid.
- Sámedikki doaibmabaji 2020-2023 oktan váldoulbmilin lea ovddidit sámediggelága ođasmahttima eamiálbmotvuoigatvuođaid vuođul.
Vuoigatvuođaministeriija: Sámediggelága rievdadusa válmmastallan vuolgá johtui 26.11.2020
Lassidieđut
Ságajođiheaddji Tuomas Aslak Juuso tel. 040 687 3394, tuomas.juuso(at)samediggi.fi
