Sámediggi ohcá mearreáigásaš EU-áššiid ja searvvušlaš ovdamiehtama (FPIC) spesiálaáššedovdi

EU- ja FPIC-spesiálaáššedovdi bargá gáibideaddji áššedovdi- ja áššemeannudanbarggus ja vástida EU-áššiid válmmaštallamis ja koordineremis ja maid searvvušlaš ovdamiehtama (FPIC) guoski áššiid válmmaštallamis ja áššemeannudeamis. Bargu juohkása sisdoalu dáfus guovtti ollisvuhtii dan láhkai, ahte EU-áššiid válmmaštallan váldá 50 % ja ovdamiehtanáššit 50 % bargoáiggis.

EU-áššiid válmmaštallamii ja koordineremii gullá ee.

• čuovvut EU mearrádusbargama ja guovddáš politihkka-, prográmma- ja njuolggadusproseassaid ovdáneami ja maid koordineret Sámedikki siskkáldas EU-válmmaštallama ovttasráđiid sektoriid vástuvirgeolbmuiguin,
• doarjut ja veahkehit Sámedikki EU-bealiváldimiidda, cealkámušaide ja eará EU-áššiide laktáseaddji áššebáhpáriid sisdoaluid válmmaštallamis,
• oktiiheivehit áigeplánaid, mat laktásit EU-áššiid válmmaštallamii,
• deaivvadit čanusjoavkkuiguin ja oassálastit dárbbu mielde ráđđádallamiidda, mat gusket Sámedikki doaibmasuorggi.

Searvvušlaš ovdamiehtamiid (FPIC) válmmaštallan ja áššemeannudanbargguide gullá ee. ovdamiehtanohcamušaid árvvoštallan, válmmaštallan ja ovdanbuktin Sámedikki dutkanehtalaš ráđđái, fuolahit lassečilgehusain, mearrádusaid ollašuhttimis ja čuovvumis. Dasa lassin bargguide gullá válmmaštallat evttohusa searvvušlaš ovdamiehtamiid mieđiheami guoski meannudeapmin áigái jagi 2027 maŋŋá.

Bálvalangaskavuođa dieđut

Bargu álgá soahpamuša mielde nu jođánit go vejolaš ja bistá 31.12.2027 rádjai. Barggu deavdimis čuvvojuvvo njealji mánotbaji geahččalanáigi.

Mearreáigásaš spesiálaáššedovdi doaibma gullá Sámedikki almmolaš doaimmahaga vuollái.

Sámedikki doaibmabáiki lea Sámekulturguovddáš Sadjosis, Anáris, muhto barggu sáhttá bargat gáiddusin.

Ohccis vurdojuvvo

Seađusvuđot gelbbolašvuođagáibádussan lea skuvlejupmi, man doaibma eaktuda, ja dasa lassin gáibádussan lea sámegiela máhttu (Sámedikki bargoortnet 71 §).

Doaimma ceavzilis dikšuma eaktun leat:

• heivvolaš alit allaskuvladutkkus
• erenomáš buorit čálalaš ja njálmmálaš gulahallannávccat
• hárjánupmi gáibideaddji áššedovdi- ja válmmastallanbargguide
• buorit ovttasbargo-, gulahallan- ja ráđđádallandáiddut
• návccat iehčanas bargamii, oppalašvuođaid hálddašeapmái ja áigeplánaid koordineremii
• erenomáš buorre eaŋgalasgiela máhttu

Barggu dikšuma veahkehit erenomážit:

• EU-politihka ja EU njuolggadus- ja prográmmaproseassaid dovdámuš
• sámekultuvrra, sámiid vuoigatvuođaid ja sámiid ruovttuguovllu diliid buorre dovdámuš
• FPIC-prinsihpa ja dasa gullevaš vuoigatvuođalaš ja ehtalaš gažaldagaid dovdámuš

Bálká

Bálká mearrašuvvá Sámedikki bálkávuogádaga gáibádusdási IV/II mielde (vuođđobálká 2998,97 euro/mb). Vuođđobálkká lassin máksojuvvojit 24 % sámeguovllu lassi, go bargá sámiid ruovttuguovllus, ja ahkelasit bargohárjánumi mielde.

Ohcan

Ohcamušskovi, ja friijahápmásaš eaktodáhtolaš ohcanreivve ja vejolaš ánsologahallama ja eará čuvvosiid (čálalaš duođaštusat giellamáhtus ja dutkosiin) galgá doaimmahit Sámedikki čállingoddái maŋimustá 28.5.2026 dán elektrovnnalaš ohcamušskovi bokte (rahpasa ođđa lássii):

• Ohcamušskovvi 

Lassedieđuid barggus addá hálddahusjođiheaddji Pia Ruotsala-Kangasniemi, pia.ruotsala@samediggi.fi, tel. 040 726 2688.

Sámedikki doibmii sáhttá oahpásmuvvat neahttačujuhusas www.samediggi.fi

Anáris 7.5.2026
Sámediggi