AHR: Sámediggeválggaid galgá ordnet ođđasit – Ságajođiheaddji Näkkäläjärvi deattuha Sámedikki beaivválaš doaimma joatkašuvvama dassážiigo ođđa válggat lágiduvvojit

Alimus hálddahusriekti attii čovdosa Sámedikki jagi 2023 válggaid guoski áššiin. Mearrádusain AHR mearridii, ahte váldojuvvojit máŋga olbmo Sámedikki jagi 2023 válgalogahallamii ja Sámediggeválggat lágiduvvojit ođđasit.

Sámedikki ságajođiheaddji Pirita Näkkäläjärvi dadjá, ahte dilli lea duođalaš. Sámedikki stivra gieđahallá AHR:a mearrádusaid badjelmearálaš áššin čoahkkimis 27.3.2024.

– Oahpásmuvvat alimus hálddahusrievtti mearrádusaide dárkilit. Dassážiigo ođđa válggat lágiduvvojit, lea dehálaš sihkkarastit, ahte Sámedikki beaivválaš doaibma sáhttá joatkašuvvat dábálaččat. Mis lea olu bargu buot golmma Suomas ealli sámegiela, sámekultuvrra ja buot sámiid árbevirolaš ealáhusaid buorrin, deattuha ságajođiheaddji Näkkäläjärvi.

Ságajođiheaddji Näkkäläjärvi muittuha Sámedikki vuđoleamos dárkkuhusas. Dat laktása eandalii buot golmma Suomas ealli sámegiela ja sámekultuvrra doalaheapmái ja ovddideapmái ja maiddái eamiálbmotvuoigatvuođaide ja sámiid iešmearridanvuoigatvuhtii.

– Sámediggi bargá juohke beaivve barggu buot golmma Suomas ealli sámegiela sirdima várás boahtte buolvvaide olles riikkas. Dat lea buot deháleamos, dat lea iešalddes buot. Mánát ja nuorat dárbbašit oahppamateriálaid. Kultursearvvit ja -bargit dárbbašit doarjaga. Buot sámiid árbevirolaš ealáhusat dárbbašit nannema. Dát bargu ii oaččo váttásmuvvat makkárge siva geažil, Näkkäläjärvi lohká.

Sámediggelága divvun čoavddášii dili

Ságajođiheaddji Näkkäläjärvi sávvá, ahte sámediggeláhkaevttohusa gieđahallan riikkabeivviin joatkašuvašii nugo lea plánejuvvon, daningo lága divvun sáhttá čoavdit dili. Dálá sámediggeláhka lea boarásmuvvan, dat lea dagahan olu tulkoma ruossalasvuođaid ja dolvon dálá eahpečielga dillái.

– Sámediggelága ođasmahttin sáhttá buktit čovdosa dán guhkálaš, sámiid iešmearridanvuoigatvuođa guoski riidui. Sámiid virggálaš ovddasteaddji Sámediggi ja guokte maŋŋálas riikka ráđđehusa leat dohkkehan ráđđádallanbohtosa ođđa sámediggeláhkan. Sámedikki dievasčoahkkima mearrádus doarjut sámediggeláhkaevttohusa dahkkui jo mannan doaibmabajis. Sámediggeláhkaevttohus čoavddášii maiddái ON:id orgánaid gávnnahan, hui váidalahtti riikkaidgaskasaš olmmošriektesoahpamušaid loavkidemiid, ságajođiheaddji Näkkäläjärvi dadjá.

Sámediggeláhkaevttohus lea oaiveministtar Orpo (kok) ráđđehusprográmmas ja ovttaveardásašvuođadieđáhusas. Ráđđehusa evttohus addui ovttamielalaččat riikkabeivviide juovlamánus 2023. Láhkaevttohus lea riikkabeivviid váljagottiid gieđahallamis. Lága evttohuvvon lágafápmuiboahtinbeaivi lea 1.7.2024.

– Sámediggeláhkaevttohus buvttášii čielggasvuođa sámediggelága heiveheapmái. Dat ođasmahtášii nuppástusohcama válgalogahallamii nu, ahte buorida ovttaskas olbmo vuoigatvuođadorvvu. Dat maiddái nannešii sámiid demokratiija sihkkarastimiin ovttaveardásaš vejolašvuođa jienastit guhkes mátkkiid sámeguovllus. Lea dehálaš doallat gitta evttohuvvon lágafápmuiboahtinbeaivvis 1.7.2024. Jáhkán, ahte mii buohkat háliidivččiimet beassat ovddosguvlui dán hástaleaddji dilis ja gávdnat čovdosa, ságajođiheaddji Näkkäläjärvi lohká.

Ságajođiheaddji gáibida áššálaš ságastallama

Dás loahpas vel ságajođiheaddji Näkkäläjärvi ávžžuha ahte ságastallo áššálaččat Sámedikki birra.

– Sámediggi lea ovddideaddji fápmu servodagas. Sámediggi gáhtte buot golbma Suomas ealli sámegiela ja sámekultuvrra. Sámediggi doarju sámiid buot árbevirolaš ealáhusaid. Sámediggi háliida váfistit sámiid ruovttuguovllu eallinfámu ja bargat viidát oktasašbarggu sierra doaibmiiguin, Näkkäläjärvi muitala.

Lassedieđut: 

Pirita Näkkäläjärvi
Ságajođiheaddji
044 7533 766
pirita.nakkalajarvi@samediggi.fi