Mánnu šaddá láđasmánnun borgemánus – Olles 20 jagi sámemánáid ja -nuoraid buorrin iešguđetlágan doaimmain

Sámi mánáidkulturguovddáš Mánnu álggahuvvui seamma áigge go vuosttaš Ijahis idja ordnejuvvui Anára gilis geasset 2004. Mánáidkulturguovddáža doaibma lea joatkašuvvan olles áigge dien rájes go dan Sámediggi válddii iežas vuollai. Okta Mánu dehálaš mihtomeriin lea ahte sámemánáin livčče maid rievttit iežaset gillii ja kultuvrii. Astoáiggedoaimmat eai olus gávdno sámegillii ja Mánnu lea geahččalan nuorat buolvvaid joksat ja dáhpáhusaid bokte fállat maid vásáhusaid sin giela nannemii.

Wimme loaiddasteamen Ijahis ijas jagis 2004. Seamma jagi álggahuvvui mánáidkulturguovddáš Mánnu. Govva: Sámediggi.

– Doaibma álggahuvvui roahkadit 20 jagi dassái ja otnábeaivve Mánnu lea dehálaš ovttasbargoguoibmi servviiguin, skuvllaiguin ja dáhpáhusaiguin. Ollu lea rievdan servošis, boarrásut buolvvat leat vádjolan geat dalle álgoáiggiin ledje Mánu kulturgurssaid oahpaheaddjit. Muhto ođđa olbmot ja čehppodat ihtá duollet dalle ja addá buori dovddu doaimma joatkevašvuhtii, muitala Mánu doaimmajođiheaddji Petra Biret Magga-Vars, gii lea bargan olles áigge sámi mánáidkulturguovddážis, dien rájes go doaibma vulggii johtui.

Ijahis idja lea maid bearrašiidda oaivvilduvvon kulturdáhpáhus. Mánáin lea vejolaš váhnemiid mielde oahpásnuvvat dáhpáhussii ja návddašit bearrašiin ovttas geasi maŋimus sámedoaluin. Bearjadaga festiválabeaivi álggahuvvo mánáid ja nuoraid doaimmain. Mánnu-bargobájit leat dan jagi fas ođđa fáttaiguin ja árbevirolaš áššit leat maid váldon mielde. Dán jagi bargobájiin lea vejolaš oahpat čatnat bohccočuolmma, bealljegoađi cegget ja buđaldallat Ilu gieđaiguin -bargobájis. Bargobájiid jođihit dáiddaduojár Tuula-Maija Magga-Hetta, duojár ja oahpaheaddji Mathis Ole Vars sihke badjeolmmoš Issát-Heandarat Näkkäläjärvi. Bargobájit leat oaivvilduvvon sámi guovllu skuvllaid ohppiide ja daidda lei ovddalgihtii almmuheapmi.

Nuoraide maid lea dehálaš ordnet iežaset lávddi. Ijahis idja -festivála ordne Ijahis ija násttážat konseartta bearjadaga 16.8. diibmu 13.00–14.30. Konseartta áigge mánáide fállojuvvo bommulsohkar. Festiválalávvardaga 17.8. mánáide ordnejuvvo ámadajumálen diibmu 17.30–19.00 ja bommulsohkkar-fálaldat lea diibmu 17.30–20.00 áigge.

Láđasmánnu-doaimmat johtá maŋŋel Ijahis ija maid Gáregasnjárgii, Eanodahkii ja Vuhččui ja daid birra dieđihuvvo sierra.

– Lea dehálaš čalmmustahttit sámi mánáidkultuvrra viidát ja geahččalit njoamuhit ilu ja movtta doaimmaid bokte vaikko ii livčče nu ollu dan áigge servošis ruđaid juohkit kultuvrii, dadjá doaimmajođiheaddji Magga-Vars.

Lassedieđut:

Petra Biret Magga-Vars
Doaimmajođiheaddji, Sámi mánáidkulturguovddáš
040 732 5503 / 010 839 3110
petra.magga@samediggi.fi