Nuoraidráđđi jorgalahttá Seta arvedávgesániid sámegielaide
Čuovvovaš buolva arvedávgesápmelaččain oažžu šaddat bajás nu, ahte sii nákcejit muitalit iežaset identitehtas sámegillii.
Sámedikki nuoraidráđđi jorgalahttá Seta rs:a arvedávgesániid anáraš-, nuortalaš- ja davvisámegillii ja almmustahttá daid nuoraidráđi dieđihan- ja rávvensiidduin. Sátnerádju čohkke oktii sohkabealle- ja seksuálavehádagaid guoski doahpagiid ja tearpmaid. Vaikke sátnerájus rahppojit maiddái eará sánit ja temát, mat laktásit arvedávgeservošii ja dan birrasii, lea dan váldosisdoallun sohkabeali ja seksuála orientašuvnna máŋggahámatvuohta.
– Arvedávgesániid jorgaleapmi lea vuogas joatkka árat jorgaluvvon seksualitehta sátnegirjái. Jorgalemiin tearpmaid bastit fállat arvedávgesápmelaččaide sániid iežaset meroštallamii, muhto maiddái lasihit sin oktiigullevašvuođa sámeservošii ja sámeservoša arvedávgediđolašvuođa, gávnnaha nuoraidráđi ságajođiheaddji Anni-Sofia Niittyvuopio.
Sátneráju jorgaleapmi ja čohkken lea dehálaš sámenuoraid seksualitehta- ja sohkabealleidentitehta ovdáneapmái. Sátneráju vehkiin sii bastet meroštallat iežaset ja gulahallat eará arvedávgesápmelaččaiguin maiddái stáhtaid rájáid badjel. Sátnerádju ii goittotge bastte ollásit fáhtet arvedávgesápmelaččaid máŋggahámatvuođa, dasgo juohkehaččas lea iežas vásáhus nu iežas go identitehta birra. Sátneráju jorgalemiin nuoraidráđđi geahččala maiddái álggahit ságastallama seksualitehta- ja sohkabeallevehádagaid vuoigatvuođain ja sajádagas sámeservošis.
Jorgalanbargu dahkko terminologiija oasil ovttas Sámi Giellagálduin. Máŋggaid sániide gávdnojit juo Sámi Giellagáldu giellajuhkosiin normerejuvvon tearpmat. Jorgalanbargguin čohkkejuvvojit sánit, mat leat juo gávdnomis, olahahtti ja álkit logahahtti hápmái. Ođđa tearpmaid buohta lágiduvvojit bargobájit arvedávgesápmelaččaide ja ná arvedávgesearvvuš lea mielde ođđa tearpmaid ovddidanbarggus.
Diehtu sátneráju jorgaleamis lea juksan sámenuoraid stáhtarájáid badjel. Nuoraidráđđi sávvá oktasašbarggu sátneráju viidásabbot lávdadeapmái ja vejolaččat sátneráju jorgalahttima várás maiddái eará sámegielaide.
Sápmi Pride lágiduvvui 2017 Anáris. Govva: Ville-Riiko Fofonoff
Lassidieđut:
Anni-Sofia Niittyvuopio
Sámedikki nuoraidráđi ságajođiheaddji
+358 40 7082 072
anni-sofia.niittyvuopio(at)samediggi.fi
Elli-Marja Hetta
Nuoraidčálli
050 382 5179 / 010 839 3134
elli-marja.hetta(at)samediggi.fi
