Ođđa mokta dearvvasvuođadieđu lohkamii! Dearvvasvuođadieđu oahppomateriálat almmustuvvan sámegillii

Eale dearvan / Ele tiervân lea badjeskuvlla dearvvasvuođadieđu oahppomateriálaráidu. Diibmá almmustuvai davvisámegiel 7. luohká digimateriála Eale dearvan 7. Dál oahppomateriálaráidu joatkašuvvá, go Sámedikki skuvlendoaimmahat lea almmustahttán dearvvasvuođadieđu 8. luohká oahppomateriála digitála hámis sihke davvisámegillii ja anárašgillii.

Oahppogirji vuolgá johtui iešdovdamušas. Teavsttas suokkarduvvo mo iešdovdu, dovddut, sosiálalaš dáiddut ja olmmošgaskavuođat váikkuhit buresveadjimii. Girjjis lea maiddái diehtu rávásmanagis ja seksuálavuođas. Dasa lassin dorvvolašvuhtii oahpásmuvvat dorvodáidduid, vuosttasveahkkedáidduid, dáhpedorpmiid eastadeami ja maid buollin- ja johtolatdorvvolašvuođa ovddideami geahččanguovlluin.

Eale dearvan 8 ja Ele tiervân 8 -oahppomateriálaid vuođđun lea suomagiel dearvvasvuođadieđu oahppogirji Syke 8, mii lea jorgaluvvon ja heivehuvvon sámás. Oahppogirjji davvisámegillii lea jorgalan Sulo Aikio ja anárašgillii Fabrizio Brecciaroli.

Lassedieđut

Unni Länsman
Oahppomateriálaplánejeaddji
unni.lansman@samediggi.fi

Miina Seurujärvi
Oahppamateriálaplánejeaddji
miina.seurujarvi@samediggi.fi

Marita Aikio
Oahppomateriálaplánejeaddji
marita.aikio@samediggi.fi