Ruoššaluosa galgá meroštallat vahátlaš vierisšládjan
Sámediggi gáibida, ahte ruoššaluossa meroštallo vahátlaš vierisšládjan sihke Suomas ja EU:s jođáneamos lági mielde. Ruoššaluossa áitá Deanu ja Njávdáma čázádagaid ekovuogádagaid, eakti luossanáliid ja olbmuid dearvvasvuođa.
Ruoššaluosaid mearri lea sturron Deanus ja Njávdámis maŋimuš bárahis jagiin meariheamet. Detnui gorgŋo diibmá ruoššaluosat juo eanet go Atlántta luosat. Ná stuorra mearis ruoššaluosat áitet Atlántta luosa ceavzima sihke jogain ja mearas. Ruoššaluosaid jápmin ja guohcageapmi jogaide rievdada jogaid ekovuogádaga ja áitá maiddái olbmuid dearvvasvuođa.
Einnostusaid mielde geassit 2023 dáidda jogaide gorgŋot vel eanet ruoššaluosat. Danin Sámediggi gáibida, ahte juo geassit 2022 galgá ráhkkanišgoahtit ruoššaluosaid geahpedeapmái čuovvovaš gease earret earáid geahččaladdamiin sierralágan bivdovugiid ovttas báikkálaš bivdiiguin.
– Suoma stáhta ferte guoddit ovddasvástádusa Deanu ja Njávdáma čázádagaid ja eakti luossanáliid suodjaleamis ja álggahit buot dárbbašlaš doaimmaid eastadan dihte ruoššaluosa katastrofalaš leavvama. Doaimmat livčče dárbbašuvvon jo áigá ja dál dain álgá leat duođalaš hoahppu, dadjá Sámedikki I várreságadoalli Anni Koivisto.
Ruoššaluossa ii leat vel dál meroštallon mearkkašahtti vahátlaš vierisšládjan ii Suoma sisriikkalaš vierisšládjalogahallamis iige EU vástideaddji logahallamis. Sámediggi gáibida, ahte ruoššaluossa lasihuvvo dáidda logahallamiidda jođáneamos lági mielde. Dán oktavuođas berre spiehkastatnjuolggadusaiguin dahkat vejolažžan ruoššaluosa vuovdin dan muttus go dat lea ain borahahtti.
Liŋka Sámedikki evttohussii: Esitys kyttyrälohen lisäämiseksi haitallisten vieraslajien luetteloon
Lassedieđut:
Anni Koivisto
I várreságadoalli
040 415 5969
anni.koivisto@samediggi.fi
Leo Aikio
II várreságadoalli
040 621 6505
leo.aikio@samediggi.fi
