Sámediggi ja Dearvvašvuođa ja buresveadjima lágádus nannejit ovttasbarggu, mii guoská sámeáššiid

Vuolláičállindilálašvuođa njuolggosáddaga sáhttá čuovvut gaskavahko 29.11.2023 dii. 13 rájes sámegielaiguin ja suomagillii. Čuovo sáddaga dáppe (Zoom)

Sámedikki ja THL jođiheaddjit deaivvadeaba Anáris Sámekulturguovddáš Sajosis.

Sámediggi ja THL háliidit nannet sámeáššiid guoski ovttasbarggu ovttasbargosoahpamušain, mii vuolláičállojuvvo deaivvadeamis. Ovttasbargosoahpamuššii gullet jahkásaš ovttasbargoráđđádallamat, main sohppojuvvo dárkilabbot jahkásaš doaimmaid birra.

”Soahpamuš lea mearkkašahtti, daningo dan vuođul huksejuvvo vuođđu, man bokte sámit leat mielde sin guoski proseassain ja daid plánemis. Lea dehálaš, ahte dieđuid buvttadeami oktavuođas sámiid kollektiivvalaš eamiálbmotvuoigatvuođat earuhuvvojit”, dadjá Sámedikki ságajođiheaddji Tuomas Aslak Juuso.

”Sámit eamiálbmogin leat dehálaš oassi Suoma máŋggalágán álbmogis. Mii háliidat THL:s vuhtiiváldit sin boahttevuođa buorebut min doaimmas ja dahkat dan buori ovttasbarggus ja vuorrováikkuhusas sámiiguin ja Sámedikkiin”, dadjá THL oaivehoavda Markku Tervahauta.

Soahpamuš dihkkáda konkrehta daguid ovttasbargui

Sámedikki ja THL ovttasbargosoahpamušas sohppojuvvo oktasaš doaimmain earret eará čuovvovaš áššit:

• Plánet ovttasbarggus dutkan- ja ovddidanprošeavttaid ja ovddidit THL materiálaid Suoma sámeálbmoga dearvvašvuođa ja buresveadjima ovddideami várás.
• Plánet ovttas dieđu buvttadeapmái ja hálddašeapmái rávvagiid, main vuhtiiváldit sámiid guoski dieđu erenoamášvuođa.
• Vuođđudit sámeáššiid guoibmeráđi THL kultuvrralaš máŋggalágánvuođa doaimma oassin. Guoibmeráđi dárkkuhussan lea doaibmat ovttasbargofierpmádahkan doibmiide, mat ovddidit sámiid dearvvašvuođa ja buresveadjima ja sihkkarastit dieđujohtima ja ovttasbarggu.

Lassin ovttasbargosoahpamuš buktá THL doibmii mihttomeriid, maiguin lasihuvvo bargiid máhttu sámegielaid, kultuvrra ja eamiálbmogiid vuoigatvuođaid birra. Maiddái lágádusa sámegielat gulahallan ovddiduvvo.

Ovttasbargguin ovddidit lágaid ollašuvvama

Ovttasbargosoahpamuša duohken lea THL viggamuš ovddidit sámeálbmoga dearvvašvuođa ja buresveadjima. Dat lea lágádusa lágas mearriduvvon doaimma oassin, mas ovddiduvvo Suoma álbmoga dearvvašvuohta ja buresveadjin. Sámedikki lágas mearriduvvon bargu lea ollašuhttit sápmelaš kulturiešráđđema ja bajásdoallat sámiid giela ja kultuvrra.

Ovttasbargu ovddida maiddái ON:id julggaštusa eamiálbmogiid vuoigatvuođaid birra (A/RES/61/295) ja eamiálbmogiid máilmmikonferánsan dovddus ON:id oktasaščoahkkima alla dási dievasčoahkkima loahppaáššebáhpára (A/RES/69/2) mihttomeriid, maiguin ovddidit sápmelaš dearvvašvuođa ja buresveadjima.

Lassedieđut

Tuomas Aslak Juuso
Sámediggi, ságajođiheaddji
tel. 040 687 3394
tuomas.juuso@samediggi.fi

Anne Länsman-Magga
Sámediggi, sosiála- ja dearvvašvuođačálli
tel. 040 182 9998
anne.lansman-magga@samediggi.fi

Markku Tervahauta
THL, oaivehoavda
tel. 029 524 6001
markku.tervahauta@thl.fi

Anu Castaneda
THL, dutkanprofessor
tel. 029 524 7848
anu.castaneda@thl.fi