Sámedikki ja THL ovttasbargofidnu ovddida doaimmaid sámiid miela buresveadjima ovddideami várás
Sámediggi ja Dearvvašvuođa ja buresveadjima lágádus (THL) leat ovttasbarggus válmmaštallan fitnu, mas ovddiduvvo álbmotlaš mielladearvvašvuođastrategiija mielde doaimmat sámeálbmoga várás. Fitnus ovddiduvvo maiddái sámeoaidninčiegaid vuhtiiváldin THL barggus.
Fitnus leat doaimmat sihke sámiid ja románaid miela buresveadjima ovddideami várás. Románaid ja sámiid miela buresveadjima ovddideapmi -fidnu ollašuhttojuvvo jagi 2023–2024 áigge. Fidnu ollašuhttima várás lea bálkáhuvvon plánejeaddji, gean bargun lea sámiid miela buresveadjima dárbbuid ovddideapmi. Doaibma lea vuosttas sámeáššiid áššedovdi doaibma Dearvvašvuođa ja buresveadjima lágádusas.
Ovttasbarggu bokte bargagoahtit hástalusaid ovdii, maid sámeálbmot lea ovdanbuktán
Fitnus lea dárkkuhus dahkat nanos ovttasbarggu sámeservošiin.
– Fitnu plánen lea ollašuhtton buori ovttasbarggus. Lea historjjálaš ášši, ahte THL lea iežas rekryteremis vuosttas háve eaktudan hárjánumi sámeservošiiguin bargamis ja sámegiela máhtu. Lea dehálaš, ahte rekryteremis lea adnojuvvon ávkin Sámedikki máhttu sámegiela ja kultuvrralaš máhtu árvvoštallama oasil, dadjá Sámedikki ságajođiheaddji Pirita Näkkäläjärvi.
Fitnu doaimmat árvvoštallojuvvojit ovttas Sámedikki sosiála- ja dearvvašvuođalávdegottiin.
– Eiseválddit galget gullat sámeservoša sámiid guoski áššiin, ja ovddidit daid doaimmaid, maid sámesearvvuš ieš doallá dehálažžan, dadjá Sámedikki sosiála- ja dearvvašvuođalávdegotti ságajođiheaddji Leena Niittyvuopio-Jämsä.
THL ja Sámediggi leat soahpan jagi 2023 áigge ovttasbarggu nannema birra. Ovttasbargosoahpamuša duohken lea THL viggamuš ovddidit sámeálbmoga dearvvašvuođa ja buresveadjima oassin lágádusa láhkageatnegahtton doaimma, mas ovddiduvvo Suoma álbmoga dearvvašvuohta ja buresveadjin. Sámedikki láhkageatnegahtton bargu lea ollašuhttit sápmelaš kulturiešráđđema ja bajásdoallat sámiid giela ja kultuvrra.
Fitnu doaimmat
Fitnu sámiid guoski oasi ulbmilin lea ovddidit sámiid miela buresveadjima earret eará,
- nu ahte vuhtiiváldá sámegiela ja kultuvrra bálvalusaid ovddideamis, mat dorjot mielladearvvašvuođa ja eará doaimmain
- dainna lágiin, ahte nanne sosiála- ja dearvvašvuođabálvalusaid ámmátolbmuid kultuvrralaš gelbbolašvuođa sámeálbmoga mielladearvvašvuođa doarjuma várás
- lasihemiin materiálaid oažžuma, mat dorjot sámegielagiid mielladearvvašvuođa.
Loga lasi:
Lassedieđut:
Pirita Näkkäläjärvi
044 753 3766
Ságadoalli
pirita.nakkalajarvi@samediggi.fi
Anne Länsman-Magga
Sosiála- ja dearvvašvuođačálli
040 182 9998
anne.lansman-magga@samediggi.fi
Kaisa Ruokojärvi
ma. Sosiála- ja dearvvašvuođačálli
040 570 8457
kaisa.ruokojarvi@samediggi.fi
Niila Rahko
THL / plánejeaddji
0295247641
niila.rahko@thl.fi
Liŋkkat:
https://www.flickr.com/photos/samediggi-saamelaiskarajat/albums
- Sámedikki Flickr-konttus gávnnat govaid ee. Sámedikki doaimmas, lahtuin ja dáhpáhusain. Govaid sáhttá geavahit diehtojuohkimii čuovvumin buriid dábiid. Merkešitgo gova gáldu ja govvejeaddji nama.
Lassedieđut Sámedikkis:
Sámediggi lea sápmelaččaid álbmotválljejuvvon iešráđđenorgána Suomas. Iežas lágain (L974/1995) vuođđuduvvon Sámediggi dorvvasta doaimmas bokte sápmelaččaid eamiálbmotkultuvrra seailuma ja ovddideami. Sámediggi pláne ja ollašuhttá sápmelaččaid gielalaš ja kultuvrralaš iešhálddašeami ja gohcá ja ovddida sápmelaččaid vuoigatvuođaid ja eallindiliid.
