Sámedikki stivra doarju olmmošvuoigatvuođaváidaga dahkama válgalogahallama ja válggaid guoski áššis

Sámedikki stivra mearridii čoahkkimis doarjut dan, ahte stivrra lahtut ovttas vuolláičállet olmmošvuoigatvuođaváidaga ON:id olmmošvuoigatvuođakomiteai Sámedikki válgalogahallama ja válggaid guoski áššis. Sámedikki stivrras leat ovddastuvvon buot golbma suomas hállojuvvon sámegiela (nuortalašgiella, anárašgiella ja davvisámegiella), buot sámeguovllu gielddaid guovllut ja maid sámeguovllu olggobealguovlu.

Olmmošvuoigatvuođaváidda guoská mearrádusaid, maid alimus hálddahusriekti (AHR) lea 27.3.2024 addán Sámedikki válgalogahallamis ja sámediggeválggain. AHR mearridii merket 72 olbmo Sámedikki jagi 2023 válgalogahallamii Sámedikki orgánaid mearrádusaid vuostá ja ordnet sámediggeválggaid ođđasit.

– Sámediggi bealušta eamiálbmotvuoigatvuođaid nannema guhkes linnjá. Sámedikki stivra doarju olmmošvuoigatvuođaváidaga. Dat lea oassin boatkanmeahttun ollisvuođa, mas lea gávnnahuvvon máŋgii, ahte Suopma loavkida riikkaidgaskasaš olmmošvuoigatvuođasoahpamušaid Sámedikki válgalogahallanáššis, dadjá Sámedikki ságajođiheaddji Pirita Näkkäläjärvi.

ON:id olmmošvuoigatvuođakomitea ja nállevealaheami vuostásaš komitea (CERD) adde Supmii jagiin 2019 ja 2022 sivalažžan cealki čovdosiid sámediggelága dulkojumis ja geatnegahtte Suoma dárkkistit, ahte láhka gudnejahttá sámiid iešmearridanvuoigatvuođa.

ON:id soahpamušbearráigeahččoorgánaide, sáhttá dahkat oktagasváidagiid priváhtaolmmožin dahje priváhtaolbmuid jovkui gullevažžan, jos oaidná ahte lea loavkiduvvon ON:id olmmošvuoigatvuođasoahpamušain dahje daid válljenvuloš beavdegirjjiin dáhkiduvvon vuoigatvuođain.

– Sámedikki stivra doarju oktagasváidaga dahkama, daningo AHR maŋimuš čovdosat loavkidit sámiid iešmearridanvuoigatvuođa eamiálbmogin, dadjá ságajođiheaddji Näkkäläjärvi.

Maiddái Sámedikki čoahkkin ságastalai 12.4.2024 AHR maŋimuš čovdosiin. Čoahkkima eanetlogu čielga oaidnu lei, ahte gažaldat lea eamiálbmotvuoigatvuođaid ja olmmošvuoigatvuođaid loavkidemiin.

Linjen kirkočoahkkimii: Sámediggi doarju guovtti bálddalas náittosdilleáddejumi

Sámedikki stivra mearridii čoahkkimis maiddái Sámedikki linnjemis kirkočoahkkimii, ahte Sámediggi doarju bismmáidčoahkkima evttohusa lasihit njuolggadusa bálddalas náittosdilleáddejumiin kirkoortnegii. Nuppis náittosdilli áddejuvvo almmáiolbmo ja nissonolbmo gaskasaš áššin ja nuppis náittosdilli áddejuvvo guovtti olbmo gaskasaš áššin. Áddejumit leat teologalaččat sierra láhkai ákkastallon.

– Sámediggi hárjeha arvedávgepositiivvalaš politihka, ja mii háliidat ahte dat oidno maid min kirkolaščoahkkinlinnjemiin. Doaibmaprográmmas 2024–27 mii mearrideimmet arvedávgepolitihkalaš prográmma ráhkadeamis Sámediggái. Mii doarjut bismmáidčoahkkima evttohusa, daningo dan mielde buot párat sáhttet oažžut kirkolaš vihaheami, muhto evttohus ii loavkit geange vuoigatvuođaid, dadjá ságajođiheaddji Näkkäläjärvi.

Sámiin lea Suoma evangelalaš-luteralaš kirku kirkočoahkkimis ovddasteaddji ja guokte várreovddasteaddji, geaid Sámedikki čoahkkin vállje njealji jahkái. Kirkočoahkkin čoahkkana čuovvovaš háve miessemánus ja gieđahallá bismmáidčoahkkima evttohusa.

Lassedieđut:

Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi