Spiehkastatjagi dagahan vahágiid boazodollui galgá buhttet
Sámediggi doarjala stáhtaráđi lahtuide, vuoi vahágiid buhttemii čujuhuvvošii vuoiggalaš ja maiddái sturrodaga dáfus doarvái stuorra mearreruhta. Mearreruđa galgá juolludit daid guovlluide ja badjeolbmuide, geat leat erenomážit gillán vahágiid jagiid 2019-2020 spiehkastat dálke-, muohta- ja luonddudiliid dihtii. Stáhtaráđđi gieđahallá ášši ollesčoahkkimis duorastaga 27.5.2021.
Ráđđehus lea soahpan 25.5.2021 jagi 2021 goalmmát lassebušeahttaevttohusas. Dálvvi 2019-2020 muohtadili dagahan boazovahágiid buhttemii várrejuvvo 6 miljovnna euro. Submi vuođđuduvvá eana- ja meahccedoalloministeriija evttohussii.
– Lean fuolas badjeolbmuid dilis, dasgo boazodoallu lea gillán viiddes vahágiid spiehkastat dálkedili dihtii. Lea dehálaš, ahte boazodoalloláhka heivehuvvo dál vuosttas háve boazodoalu boahttevuođa sihkkarastima várás, dadjá Sámedikki ságajođiheaddji Tuomas Aslak Juuso,
Sámediggi doarjala ministaraide, ahte buhtadusaid várás addon mearreruhta vihkkedallošii vel stáhtaráđi ollesčoahkkimis. – Lea govttoheapme, ahte iežasvástooasit leat báhcimin ná stuorisin, vaikke lága dárkkuhussan lea veahkehit boazodoalu doaibmiid ceavzit viiddes ja vuorddekeahtes vahágiin ja sihkkarastit ealáhusa joatkašuvvama, joatká II várreságajođiheaddji Leo Aikio.
Dálvvi 2019-2020 dagahan vahágat ledje boazodoalu dáfus áibbas árvitmeahttumat. Vahágat leat dáhpáhuvvan eatnandieđalaččat viiddes guovllus ja dat čohkiidit earret eará boazojámuin, lassebiebmangoluin ja vuvdonboazomeriid gahččamis. Bálgosiid ovttastusa dahkan rehkenastima mielde boazodollui šaddan táhpagat leat 23 miljovnna euro ja vahágiid váikkuhus juohkása sullii njealje jagi áigái,
– Lea dehálaš, ahte buhtadus čujuhuvvo dasa, ahte dat veahkeha duođalaččat vearrámusat gillán guovlluid ja badjealbmáid. Leat viššalit bargan dán ášši ovdii ja mearreruđa leatge fidnen bajidit guđa miljovnna euroi. Submi ii goittotge vel leat doarvái stuoris buhttet dálvvi dagahan vahágiid boazodollui, muitala Aikio.
Boazovahátlága 1 § mielde lága ulbmilin lea veahkehit boazodoalu doaibmiid ceavzit viiddes ja vuorddekeahtes vahágiin, mat čuhcet boazodollui. Boazovahátlága ovdabargguid mielde lágain lea oaivil dahkat vejolažžan meannudeami, mainna sáhtášii jođánit vejolaš katastrofa maŋŋá váldit atnui buhttenortnega, mainna dorvvastuvvo ealáhusa joatkašuvvan.
- Sámedikki ávžžuhus stáhtaráđđái (25.5.2021)
- Sámediggi doarjalii cuoŋománus 2021 riikkabeaibellodagaide boazovahágiid vuoiggalaš buhttema olis ja boazoealáhusa joatkašuvvama sihkkarastima várás
Lassidieđut:
Tuomas Aslak Juuso
Ságajođiheaddji
040 687 3394
tuomas.juuso(at)samediggi.fi
Leo Aikio
II várreságajođiheaddji
040 621 6505
leo.aikio(at)samediggi.fi
Sarita Kämäräinen
Má. láhkačálli
040 186 7258
sarita.kamarainen(at)samediggi.fi
Govva: Tarja Läsnman
