Sámi mánáidkulturguovddáš Mánnu
Sámi mánáidkulturguovddáš Mánnu lea álggahan iežas doaimma jagi 2004. Mánnu geahččala doaimmainis nannet sámenuoraid kulturidentitehta, lasihit sámi árbevirolaš dieđu ja- dáiddu gudnejahttima, oahppama ja vurkema, dahkat vejolažžan buolvvaid gaskasaš searvvušlaš doaibmanmálliid.
Ovttasbargoguoibmin doibmet skuvllat, beaiveruovttut ja giellabeasit, maid bokte ulbmiljoavku dahjege sámeguovllu vuollái 18-jahkásaš sámemánát ja nuorat fáhtejuvvojit viidát. Geavadis Mánnu lágida skuvllaide, beaiveruovttuide ja giellabesiide doaimmaid, mat nannejit sámekultuvrra- ja sámegiela. Sámi mánáidkulturguovddáš oassálastá vejolašvuođaid mielde maiddái sámedáhpáhusaid ordnemiidda ovdamearkan buvttademiin prográmmasisdoaluid mánáide ja nuoraide.
Sámi mánáidkultuvra vuođđuduvvá searvvušlašvuhtii, njálmmálaš árbedieđu bokte oahppamii, kultuvrra, dáidaga ja duoji oahppamii. Mánáidkultuvra – doaibma lea sámi ávnnaslaš ja ávnnahis kultuvrra ovddideapmi.
Sámi mánáidkulturguovddáš -doaimma ruhtadit oahpahus- ja kulturministeriija ovttas sámeguovllu gielddaiguin ja Sámedikkiin.
Mánu ulbmilin lea
- buktit nuorra sámedáiddáriid oidnosii doaimma bokte
- addit mánáide ja nuoraide vejolašvuođaid oahppat sámi tradišuvdnadieđuid ja – dáidduid
- láhčit mánáide sámegiela lunddolaš geavahandiliid
- lasihit dieđuid eará eamiálbmogiin
- fállat mánáide vejolašvuođaid persovnna máŋggabealat ovddideapmái
- láidestit ja roahkasmahttit mánáid ja nuoraid hutkás ovdanbuktimii
- ovddidit kultur- ja dáiddabajásgeassima sámeguovllus
- sihkkarastit sámemánáid ja nuoraid buorredili
- eastadit healbama dahjege olggobeallái báhcima
- ovddidit ovttasbarggu báikkálaš ja guovllulaš doaibmiid gaskkas
Áigeguovdil
Petra Biret Magga-Vars
Guhtora Biera Jovnna Mauri PetraBiret
Heaikká Iŋger-Ánne Iŋggá Biret-Ánne PetraBiret
Doaimmajođiheaddji, Sámi mánáidkulturguovddaš
040 732 5503 / 010 839 3110
petra.magga@samediggi.fi
