Borgemánu 9. beaivve dollojuvvui riikkaidgaskasaš eamiálbmogiid beaivi
Ikte 9.8.2020 dollojuvvui riikkaidgaskasaš máilmmi eamiálbmogiid beaivi. Beaivvi ulbmil lea lebbet ja lasihit almmolaččat dieđuid eamiálbmogiidda guoski jearaldagain ja čalmmustahttit eamiálbmogiid vuoigatvuođaid suodjaleami ja ovddideami mearkkašumi.
Sápmelaččat leat okta eamiálbmot máilmmi eamiálbmogiid joavkkus ja áidna eamiálbmot, mii lea Eurohpa Uniovnna guovllus ja Suomas vuoigatvuođalaččat dovddastuvvon. Sámediggi bargá bistevaččat sámeáššiid ja vuoigatvuođaid ovddideami ovdii sihke našuvnnalaš ja riikkaidgaskasaš dásis.
Sámedikki sátnejođiheaddji Duomis Áslat Juuso mielde riikkaidgaskasaš máilmmi eamiálbmogiid beaivi lea dehálaš earenoamážit diđolašvuođa lasiheami dihte. – Sávan, ahte ovdamearkka dihte eamiálbmogiid vuoigatvuođaid ollašuvvan oččošii almmolaččat eambbo saji beaivválaš ságastallamiin ja ahte dat váldojuvvošedje duođalaččat vuhtii iešguđet doibmiid dásis sin barggus.
Jagi 2020 riikkaidgaskasaš máilmmi eamiálbmogiid beaivvi temá lea COVID-19 ja eamiálbmogiid návccat vuostálastit dan (eaŋg. COVID-19 and indigenous peoples’ resilience). Eamiálbmogat miehtá máilmmi gártet deaivat árggasteaset iešguđetlágan hástalusaid, ja COVID-19 pandemiija lea máŋgga ládje váttásmahttán sin dili ovddežis.
Ovttastuvvan našuvnnat (ON) buktá ovdan riikkaidgaskasaš máilmmi eamiálbmogiid beaivái guoski dieđáhusastis maiddái eamiálbmogiid návccaid vuogáiduvvat dillái ja ohcat pandemiija vuostásaš dáistaleapmái vugiid, mat vuođđuduvvet eamiálbmogiid árbevirolaš dihtui ja geavadagaide. Oktan dehálaš vuohkin ovddidit eamiálbmogiid dili pandemiija áigge máinnašuvvo maiddái dearvvašvuođafuolahusa bálvalusaid sihkkarastin eamiálbmogiid iežaset gillii, ja sin earenoamáš dili vuhtiiváldin.
Sátnejođiheaddji Juuso deattuha, ahte maiddái mis Suomas lea dehálaš muitit sámegielat dieđujuohkima ja sápmelaččaid gielalaš vuoigatvuođaid ollašuvvama ovdamearkka dihte dearvvašvuođafuolahusa olis. Lassin galggašii bastit buorebut sihkkarastit dan, ahte fállun leat bálvalusat, mat váldet vuhtii sámekultuvrra. Sámediggi álggahii geassemánus kampánjja ovttaveardásaš sode-bálvalusaid ovdii. Oahpásmuva Sámedikki kampánjii ovttaveardásaš sode-bálvalusaid birra kampánjasiidduin www.samediggi.fi/sote-uudistus.
Sámediggi viggá oasistis ovddidit sámegielat dieđu oažžuma ja juohkima koronavirusdili birra neahttasiidduinis.
Lassedieđut
Sátnejođiheaddji Duomis Áslat Juuso puh. 040 687 3394, tuomas.juuso(at)samediggi.fi
