Duojárat, duodjeorganisašuvnnat ja duodjeberošteaddjit čoahkkanedje Duodji Akademiija seminárii Heahttái
Duodjeárbevieru joatkašuvvan gáibida mearrediđolaš bargama, duddjonsajiid ja vejolašvuođaid dieđu ja dáiddu sirdimii buolvvas bulvii. Dát ledje guovddáš dearvvuođat Duodji Akademiija 2027 -prošeavtta bargobádjesemináras, mii čohkkii Heahttái geassemánu 13. beaivve duojáriid, duodjeorganisašuvnnaid ovddasteaddjiid ja duojis beroštuvvan olbmuid ságastallat duodjeárbevieru dálá dilis ja boahtteáiggis.
Ságastallan duoji boahtteáiggis Heahtá semináras. Govva: Adedayo Peter Allinson.
Heahtá skuvlii čoahkkanedje sullii moaddelot oassálasti, ja gáiddusoktavuođaid bokte sullii seamma olu.
Seminára ordnii panelaságastallama duodjeárbbi dálá dilis Eanodagas, Guovdageainnus ja Ruoŧa beale Gárasavvonis. Panelas ledje ságastallamin Maarit Magga Eanodagas, Ida-Maria Marakatt Gárasavvonis ja Haakon Isak Vars ja Inga Hermansen Hætta Guovdageainnus.
Ságastallamiin bohte ovdan guovlluid iešguđetlágan vuolggasajit. Duodjeárbevierru lea dál nannoseamos Guovdageainnus, go fas Eanodagas ja Gárasavvonis dan joatkašuvvamis leat eanet hástalusat. Maiddái Guovdageainnus erenomážit muorra- ja čoarvedujiid boahtteáigi bovttii fuola.
Bargobájis smihtte vugiid nannet duodjeárbevieru. Ságastallamiin deattuhedje resurssaid ja politihkalaš dáhtu mearkkašumi ja dárbbu mearrediđolaš doaimmaide. Eanodahkii ja Gárasavvonii gáibidit sajiid duddjoma várás, Guovdageainnus fas heivvolaš duddjonsajit jo gávdnojit.
Oassálastit deattuhedje, ahte vejolašvuođaid oahppat duddjot galggašii fállat jo mánnávuođa rájes. Dan lassin buolvvaid gaskasaš deaivvadeami várás dárbbašit vejolašvuođaid ja oadjebas birrasa, main diehtu ja máhttu gaskkustuvvošii lunddolaččat ođđa buolvvaide. Erenomážit Eanodagas ja Gárasavvonis sávve ahte duodjeprošeavttat ja doaimmat joatkašuvvet boatkanmeahttumit. Oasseváldit oaivvildit ahte ovttasbargu rastá rájáid lea dehálaš duoji ovdánahttimii.
Beaivvi loahpas ordnejuvvui vel duodjeávnnasbargobádji, mas vulle osttuid ja bárkku ja ságastalle ávnnasgeavaheamis. Govva: Adedayo Peter Allinson.
Beaivvi loahpas ordnejuvvui vel duodjeávnnasbargobádji, mas vulle osttuid ja bárkku ja ságastalle ávnnasgeavaheamis. Maiddái duoji ehtalaš rávvagiid hábmen ságastahtii. Ságastallamiin bođii ovdan earret eará dat, ahte iešguđet guovlluid iežaset málliid seailluheapmi lea dehálaš. Šattai ságastallan maiddái duoji ekologalašvuođas.
Semináraš ovdabukton oainnuid geavahit Duodji Akademiija 2027 -prošeavtta joatkkadoaimmain ja ođđa prošeavttaid ja doaimmaid plánemis.
Duodji Akademiija 2027 -prošeakta lea Suoma ja Norgga Sámedikkiid oktasaš prošeakta, mii oažžu ruhtadeami Interreg Aurora -prográmmas. Riikkadási ruhtadeaddjit leat Lappi lihttu ja Troms Fylkeskommune.
Loga lasi prošeavttas: Duodji Akademiija 2027
Lassedieđut:
Birit Tornensis
Plánejeaddji, Duodji Akademiija 2027
birit.tornensis@samediggi.fi
+358 40 545 7740
