Sámedikki ságajođiheaddjiidjoavku deaivvadii riikkabeaiáirasiiguin Helssegis
Sámedikki ságajođiheaddjijoavku deaivvadii 10.–12.6.2026 Helssegis riikkabeaiáirasiiguin ja eará váikkuheaddjiiguin. Deaivvadeamis ságastallojuvvui doaibmabijuid ollašuhttimis, maid sámiid duohtavuohta- ja soabadankomišuvnna lea ovdanbuktán, Sámedikki mihttomeriin čuovvovaš ráđđehusprográmmii, Sámedikki riikkabeaimuitalusa guovddáš evttohusain ja maid ovdamearkka dihte Sámedikki bušeahtas.
Sámedikki ságajođiheaddji Pirita Näkkäläjärvi ja Álbmotlaš olgešbellodaga riikkabeaiáirras, sámiid duohtavuohta- ja soabadankomišuvnna ávžžuhusaid árvvoštalli parlamentáralaš bargojoavkku ságajođiheaddji Maaret Castrén. Govva: Niina Siivikko.
Deaivvademiid dehálamos mihttomearrin lei ovdanbuktit sámiid vuordámušaid duohtavuohta- ja soabadanbargui. Sámedikki oainnuid mielde soabadanproseassa deavisvuođa eaktun leat konkrehta doaimmat, vai sáhttá sirdásit sániin daguide.
–Duohtavuohta- ja soabadankomišuvdnabargu lea sámiide mearkkašahtti vejolašvuohta. Komišuvnna loahpparaportta doaibmabidjoevttohusaid vuođul lea vejolaš juksat duođalaš nuppástusaid ja ođđa álgguid sámeáššiin Suomas. Sámedikkis leat alla vuordámušat joatkkabarggu ektui, dadjá ságajođiheaddji Näkkäläjärvi.
Sámedikki ságajođiheaddjiidjoavku ovdanbuvttii deaivvademiin doaibmabijuid, maid dievasčoahkkin vuoruhii iežas bealiváldimis 26.2.2026, ja sávai ahte doaibmabijuid ollašuhttima várás bargojuvvo mearrediđolaččat badjel válgabájiid.
Sámediggi ovdanbuvttii iežas mihttomeriid ráđđehusprográmmii 2027–2031
Deaivvademiin ságastallojuvvui maiddái Sámedikki mihttomeriid birra boahttevaš ráđđehusprográmmii. Mihttomeriin deattuhuvvojit erenomážit duohtavuohta- ja soabadankomišuvnna doaibmabidjoevttohusaid ollašuhttin, sámiid vuoigatvuođaid nannen ja sámekultuvrra ja árbevirolaš ealáhusaid eallinfámolašvuođa sihkkarastin servodaga sierra oassesurggiin.
Váldotemán leat maiddái dálkkádatnuppástussii vuogáiduvvan ja sámiid searvevuođa nannen EU-mearrádusbargamis.
– Sámediggi sávvá, ahte Sámedikki evttohusaid sáhtášii váldit mielde čuovvovaš ráđđehusprográmmii, daningo buot golmma ealli sámegiela ja sámekultuvrra bajásdoallan ja ovddideapmi leat olles Suoma oktasaš áššit, dadjá ságajođiheaddji Näkkäläjärvi.
Sámedikki evttohusat ráđđehusprográmmii 2027–2031:
- Duohtavuohta- ja soabadankomišuvnna doaibmabidjoevttohusaid ollašuhttin
- Boazodoalu doaibmaeavttuid sihkkarastin: sámi boazodoalu iežas láhka ja hálddahus ja maid boazodoalu heahtedoarjjavuogádat
- Dálkkádatnuppástussii vuogáiduvvan
- Ealáhusfoanda
- Sámeáššiid erenoamášáššedovdi EU-ovddastusas
- Sámi Giellagáldu láhkaásahuslaš sajádaga ja ruhtadeami sihkkarastin
- Sámiid kulturmearreruđa nannen
- Kumulatiivvalaš váikkuhusaid árvvoštallama ovddideapmi
- Guolástanvuoigatvuođaid sihkkarastin
- Mášengolleroggama heaittiheapmi sámiid ruovttuguovllus
- ILO 169-soahpamuša ratifiseren
- Sosiála- ja dearvvasvuohtabálvalusaid oažžuma sihkkarastin
- Sámegielaid oahpahus ja sámeoahpahus olles riikkas
- Gielalaš vuoigatvuođaid sihkkarastin: sámi giellalága ođasmahttin, sámi giellalága 31 § doarjja ja digitaliseren
- Sámegielaid ovddideapmi
- Árrabajásgeassima oažžuma sihkkarastin
- Nuoraidbarggu oažžuma sihkkarastin
- ON:id eamiálbmogiid vuoigatvuođaid julggaštusa álbmotlaš ollašuhttin
- ON:id eamiálbmogiid oassálastinvuoigatvuohta
Ráđđehusprográmmamihttomeriid lassin deaivvademiin badjánedje bušeahttagažaldagat, erenomážit Sámedikki lágas mearriduvvon bargguid ruhtadeapmi ja vejolašvuođat čujuhit lasseruhtadeami sámegielat árrabajásgeassima oahppamateriálaide.
Deaivvadeamit badjel bellodatrájáid
Vahku áigge Sámedikki ságajođiheaddjiidjoavku deaivvadii oahpahusminister Anders Adlercreutziin ja stáhtačálli Mikaela Nylanderiin. Dasa lassin riikkabeivviin deaivvaduvvui viidát Álbmotlaš olgešbellodaga, Suoma ruoŧŧelaš álbmotbellodaga, SDP, Guovddášbellodaga, Gurutlihtu ja Ruonáid riikkabeaiáirasiiguin ja riikkabeaijoavkkuiguin.
Dasa lassin deaivvaduvvui Sámiid duohtavuohta- ja soabadankomišuvnna ávžžuhusaid árvvoštalli parlamentáralaš bargojoavkku ságajođiheaddji Maaret Castréniin (olg.b.) ja 2. várreságajođiheaddji Johanna Ojala-Niemeläin (sd.).
Ságajođiheaddji Näkkäläjärvi deaivvadii maiddái Sámiid duohtavuohta- ja soabadankomišuvnna ávžžuhusaid árvvoštalli parlamentáralaš bargojoavkku váldočálli Antti Rintein ja duohtavuohta- ja soabadankomišuvnna ságajođiheaddjin doaibman Hannele Pokkain.
Sámedikki delegašuvdnii gulle ságajođiheaddji Pirita Näkkäläjärvi, II várreságajođiheaddji Tuomas Aslak Juuso ja ságajođiheaddjiid erenoamášveahkkebargit Niina Siivikko ja Minna Näkkäläjärvi.
Ruoŧŧelaš riikkabeaijoavkku joavkočoahkkimis, gurut rávddas: Sámedikki II várreságajođiheaddji Tuomas Aslak Juuso, riikkabeaijoavkku ságajođiheaddji Otto Andersson, oahpahusminister ja bellodaga ságajođiheaddji Anders Adlercreutz ja Sámedikki ságajođiheaddji Pirita Näkkäläjärvi. Govva: Niina Siivikko.
Sámedikki II várreságajođiheaddji Tuomas Aslak Juuso, SDP 2. várreságajođiheaddji Niina Malm ja Sámedikki ságajođiheaddji Pirita Näkkäläjärvi. Govva: Niina Siivikko.
- Sámedikki evttohusat ráđđehusprográmmii 2027–2031, čoahkkáigeassu suomagillii (pdf)
- Sámedikki váikkuhanáššegirji ráđđehusprográmmii 2027–2031 suomagillii (pdf)
- Sámedikki dievasčoahkkima bealiváldin duohtavuohta- ja soabadankomišuvnna loahpparaporttas
Lassidieđut:
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi
