Sámi parlamentáralaš ráđi ságajođiheapmi sirdása Suoma Sámediggái
Sámi parlamentáralaš ráđđi (SPR) čoahkkana odne 20.9.2023 Gironis dievasčoahkkimii, gos SPR ságajođiheapmi sirdása Ruoŧa Sámedikkis Suoma Sámediggái čuovvovaš 16 mánotbadjái ja Sámedikki ságajođiheaddjis Tuomas Aslak Juusos boahtá SPR ságadoalli. Seamma dilálašvuođas maiddái SPR nuoraidlávdegotti ságajođiheapmi sirdása Suoma Sámedikki nuoraidráđđái.
Suoma Sámedikki ságajođihanbaji váldoulbmilin Sámedikki ságajođiheaddji ja SPR boahttevaš ságadoalli Tuomas Aslak Juuso liste ee. Sámeguovlluid konkrehtalaš rádjáhehttehusaid earuheami ja rádjáovttasbargoorgána vuođđudeami, eamiálbmogiid oassálastinvuoigatvuođaid buorideami ON:in ja sámiid oassálastinvuoigatvuođaid buorideami EU:s.
– Sámi parlamentáralaš ráđi bargu lea hui dehálaš, go SPR koordinere sámiid oaiviliid oktasaš gažaldagaid oktavuođas ja áššiin, mat gusket sámiid álbmogin rájáid badjel, dadjá ságajođiheaddji Juuso.
SPR guhkesáigge mihttomearrin leat leamaš ee. sámiid riektedili buorideapmi ja davviriikalaš sámesoahpamuša ovddideapmi. Lassin SPR lea leamaš dehálaš rollas sámegielaid fága- ja resursaguovddáš Sámi Giellagáldu doaimma koordineremis. SPR ovddida maiddái earáid sámeprošeavttaid ollašuvvama, mat rasttildit rájáid. SPR vuollásažžan doibmet iešguđetlágan lávdegottit, maid bargu vuodju mange áigge áigeguovdilis temáide, mat gusket sámiid.
Suoma Sámedikkis dievasčoahkkimii oassálaste báikki alde ságajođiheaddji Tuomas Aslak Juuso, várrelahttu Juha-Petteri Alakorva ja ságajođiheaddji veahkkebargi Niina Siivikko. Govva: Niina Siivikko.
Ruoŧa Sámedikki stivrra ságadoalli Håkan Jonsson geige Sámi parlamentáralaš ráđi ságajođiheami Suoma Sámedikki ságajođiheaddjái, Tuomas Aslak Juusoi. Govva: Niina Siivikko.
SPR lea Norgga, Ruoŧa ja Suoma Sámedikkiid gaskasaš parlamentáralaš ovttasbargoorgána, masa maiddái Ruošša sámeorganisašuvnnat servet ovttasbargui áicin. SPR dievasčoahkkimis ráđi ovddasteaddjit golmma Davviriikkas ja Ruoššas čoahkkanit oktii unnimustá oktii jagis. Doaimmastis SPR viggá ovddidit sierra Davviriikkaid Sámedikkiid gaskasaš ovttasbarggu ja dat gieđahallá áššiid, mat gusket sámiid álbmogin rájáid badjel. SPR ovddastage Davviriikkain ássi sámiid dávjá omd. riikkaidgaskasaš oktavuođain.
Sámedikki čoahkkin vállje iežas siste ovddasteaddjiid SPR:i ovtta válgabadjái ain hávil, ja dálá válgabajis ovddasteaddjin leat: Tuomas Aslak Juuso, Anni Koivisto, Pirita Näkkäläjärvi, Anne Nuorgam, Karen-Anni Hetta, Tauno Ljetoff ja Niko Valkeapää.
Go ságajođiheapmi sirdása, de maiddái SPR hálddahusa dikšun sirdása Suoma Sámediggái, das vástida Sámedikki riikkaidgaskasaš áššiid čálli.
Lassedieđut:
Tuomas Aslak Juuso
Ságajođiheaddji
040 687 3394
tuomas.juuso@samediggi.fi
Inka Saara Arttijeff
Riikkaidgaskasaš áššiid čálli
050 574 7629
inka.saara.arttijeff@samediggi.fi
