Sátnejođiheaddji Pirita Näkkäläjärvi Brusselis “Sámiid oassálastin EU-mearrádusdahkamii dárbbaša bistevaš struktuvrraid ja doarvái resurssaid”

Sámedikki ságadoalli Pirita Näkkäläjärvi searvvai gaskavahko 1. suoidnemánu Eurohpa parlameanttas Brusselis ordnejuvvon dilálašvuhtii The EU’s policy in the Arctic, indigenous communities and ecological justice: bringing Sámi people’s voices into European decision-making. Eurohpa parlameantta gurutjoavkku ordnen dilálašvuohta čohkkii Suoma ja Ruoŧa Sámedikkiid ja Sámiráđi ovddasteaddjiid, Eurohpa parlameantta lahtuid ja eará EU árktalaš politihkas, dálkkádatvuoiggalašvuođas ja eamiálbmogiid rivttiin beroštuvvan doaibmiid. Dilálašvuođas ledje hállamin earret eará Eurohpa parlameantta várreságajođiheaddji Roberts Zīle, riikkabeaiáirras Jussi Saramo ja ovddeš Eurohpa parlameantta várreságajođiheaddji Heidi Hautala.

Dilálašvuođas háleštedje sámiid oassálastimis EU mearrádusdahkamii ja das, mo EU árktalaš politihka ja ruoná sirdašumi lea vejolaš ollašuhttit vuoiggalaččat ja nu, ahte eamiálbmogiid rievttit gudnejahttojit. EU mearrádusat ovdamearkka dihtii dálkkádaga, luonddu girjáivuođa, eanangeavaheami, energiija, infrastruktuvrra ja guovlluid ovdánahttima surggiin váikkuhit njuolga sápmelaččaid kultuvrii, árbevirolaš ealáhusaide ja árgabeaivái.

Ságadoalli Näkkäläjärvi deattuhii, ahte sámiid searvan EU mearrádusdahkamii lea ain čadnon menddo olu sierra dáhpáhusaide, ja lea eahpevirggálaš ja sorjavaš sierra proseassain dahje politihkalaš dáhtus.

– Sámiid oassálastin ii sáhte oaivvildit dušše dan, ahte sámiid bovdejit hállat dilálašvuođaide. Oassálastin galgá dáhpáhuvvat doarvái árrat, ovdalgo mearrádusat leat dahkkon ja vugiin, mainna sáhttá albma láhkai váikkuhit politihka sisdollui, Näkkäläjärvi logai.

Sámedikki mielde EU ja sámiid ovddasteaddji ásahusaid gaskii dárbbašuvvo bistevaš, struktuvrralaš ja  vuoigatvuođalaš guoibmevuohta. Dán eaktun lea earret eará bistevaš sámeovddastus Brusselis ja virggálaš ovttasbargostruktuvra Sámi parlamentáralaš ráđi ja Eurohpa parlameantta gaskkas.

Ulla Pirttijärvi buvttii ovttas čuojaheaddji Viivi Saarenkyläin luođi Eurohpa guovddážii. Govat: The Left in the European Parliament.

Dilálašvuođas deattuhuvvui maiddái, ahte oassálastinvuoigatvuođat galget leat oktavuođas konkrehtalaš resurssaide. Sámediggi oaivila mielde  EU galggašii vuođđudit sierra sámefoandda, man bokte ruhtadeami livččii vejolaš stivret njuolga sámeservošiidda ja árbevirolaš ealáhusaide olahahtti ja kultuvrralaččat ulbmillaš vugiin. Árbevirolaš sámiid ealáhusaid lassin sámefoandda bokte sáhtášii nannet sámeguovllu eallinfámu sámekultuvrii vuođđuduvvi sámefitnodagaid ja innovašuvnnaid doarjuma bokte.

Foanda galggašii doarjut ovdamearkka dihtii dálkkádatrievdamii vuogáiduvvama, guohtuneatnamiid máhcaheami ovddit dillái, vierrošlájaid dustema, árbedieđu, dutkamuša, man sámit jođihit, ja sámekultuvrra ja árbevirolaš ealáhusaid joatkašuvvama.  Oktan hohpolaš dárbun loktejedje ovdan boazodoalu heahtebiebmama ja fievrredangoluid doarjuma váttásmuvvan dálvediliin.

– Mearkkašahtti guoibmevuohta sámiiguin gáibida guokte ášši: bistevaš oassálastinstruktuvrraid ja sierra ruhtadeami, maiddái sámefoandda, mii buktá geavatlaš doarjaga sámeservošiidda, Näkkäläjärvi celkkii.

Sámediggi muittuha, ahte EU dálkkádat- ja biodiversitehtapolitihkka ja ruonásirdašupmi galget doarjut sámiid rivttiid, kultuvrra ja ealáhusaid, eai heajosmahttit daid. Sámiid oassálastin ja konkrehtalaš doarjja leat oassi Eurohpa kultuvrralaš girjáivuođas, árktalaš resilienssas ja ekologalaš vuoiggalašvuođa nannemis.

Lassedieđut:

Pirita Näkkäläjärvi
Ságadoalli
044 753 3766
pirita.nakkalajarvi@samediggi.fi