Aanar kåʹdd da Sääʹmteʹǧǧ juõʹtǩǩe õhttsažtuâjjvuõinnlõõttmõõžžid - äʹššliistâst jeäʹrbi mieʹldd sääʹmǩiõllsaž ouddpeâmm da mättʼtõõzz teäggtõõzz tuõrvvmõš
Aanar kååʹdd da Sääʹmteeʹǧǧ eeʹttǩeeʹj vuõinnlõʹtte 3. čõhččmannust 2025 Âʹvvlest kåʹddveʹrǧǧpõõrtâst juäʹtǩǩem diõtt õhttsaž ouddõsvuåppmõõžž da õhttsažtuâj ooudâsviikkâm diõtt. Mieʹrrkõskksaž vuõinnlõõttmõõžži jäʹrjstummšest sueʹppeš vuõssmõs õhttsažtuâjjvuõinnlõõttmõõžž õhttvuõđâst eeʹjjest 2023.
Snimldõk: Ville Fofonoff
Tän vuâr vuõinnlõõttmõõžžâst õhttsaž ouddõsvuåppmõõžž kõskksââʹjest leʹjje jeäʹrben sääʹmǩiõllsaž ouddpeâmm da mättʼtõõzz teäggtõõzz tuõrvvmõš. Saǥstõõllmõõžžin teäddjõʹvve jieʹnnǩiõllsaž ouddpeâmm di ǩiõllpieʹsståimmjummuž, ǥu puõʹtti eeʹjj riikkveäʹǩǩtieʹǧǧid liâ pueʹttmen muttâz, koin liâ vaaiktõõzz sääʹmǩiõllsaž ouddpeâmm riikkveäʹǩǩteägga.
Aanar kååʹddest ââʹnet veerǥlânji pukid koumm Lääʹddjânnmest mainstum sääʹmǩiõlid; aanarsääʹm, nuõrttsääʹm da tâʹvvsääʹm. Vuõinnlõõttmõõžžâst leʹjješ seämma miõl tõʹst, što sääʹmǩiõli jieʹllemviõkksažvuõđ tuõrvvmõš õõlǥat kuʹǩespeeštlaž õhttsažtuâj da riʹjttjeei resuursid.
Såbbrest ǩiõttʼtõʹlleš še jieʹllemvuõʹjjid, mäddâânnmõʹšše da pueʹrr narodkõskkvuõđid õhttneei ääiʹjpoddsaž aaʹššid di puârastvââjjâmaaʹššid. Õhttsaž ouddõsvuåppmõõžž sââʹjjen lij ooudâs veâl Pokka čuõkku leʹbe Aanar da Kihttel õhtteei vuʹvddčuâǥǥas 955 vuâđđteevvmõš.
Lââʹssen smiõʹtteš konkreettlaž õhttsažtuâjjmaallid pueʹttiääiʹjest. Vueʹssbeäʹl õlmmee haalâs juäʹtǩǩed vuõinnlõõttmõõžžid da viikkâd ooudâs õhttsažtuâj veâl ooudâs.
– Lij vääžnai jieʹlled ääv saǥstõõllmõõžž mieʹrrkõõski Sääʹmteeʹǧǧ da Aanar kååʹdd kõõsk jm. kääzzkõõzzin jäʹrjstummša da luõttu õhttneei teeʹmin. Pueʹttiääiʹjest lij samai vääžnai õõutsââʹjest tuõrvvâd sääʹmǩiõllsaž ouddpeâmm, vuâđđmättʼtõõzz da jeeʹres kääzzkõõzzi riikkâst vuäǯǯamvuâla teäggtõs sääʹmvuuʹd kooʹddin, särnn Aanar kåʹddjååʹđteeʹjj Tommi Kasurinen.
– Säʹmmlai dommvuuʹd kooʹddi rool lij kõskksaž tõʹst, mäʹhtt säʹmmlai vuõiggâdvuõđ teâuddjâʹvve vueʹjjest. Leäm rämmai, što meeʹst lij Aanar kooʹddin õhttsaž tätt viikkâd ooudårra tåimmjummuž da raaveed õhttsažtuâj, särnn I väärrsaaǥǥjååʹđteeʹjj Leo Aikio.
Såbbra vuässõʹtte Aanar kååʹddest välddõõzz saaǥǥjååʹđteeʹjj Jari Huotari, kåʹddhalltõõzz 1. väärrsaaǥǥjååʹđteeʹjj Anu Avaskari, kåʹddjååʹđteeʹjj Tommi Kasurinen di jeeʹres tåimmsuõʹrji veʹrǧǧniiʹǩǩi njonnaž. Sääʹmteeʹǧǧest såbbra vuässõʹtte kåʹddõhttsažtuâjast Sääʹmteeʹǧǧest vaʹstteei I väärrsaaǥǥjååʹđteeʹjj Leo Aikio da vaaldâšmjååʹđteeʹjj Pia Ruotsala-Kangasniemi di jeeʹres tåimmsuõʹrji veʹrǧǧneeʹǩǩ.
Lââʹssteâđaid ouʹdde
Aanar kåʹdd
Tommi Kasurinen
Kåʹddjååʹđteeʹjj
050 548 4123
tommi.kasurinen@inari.fi
Sääʹmteʹǧǧ
Leo Aikio
I väärrsaaǥǥjååʹđteeʹjj
040 621 6505
leo.aikio@samediggi.fi
