Duodji Akademiija 2027 -haʹŋǩǩõs jåttai - haʹŋǩǩõsplaaneeʹjen alttääm Birit Tornensis
Duodji Akademiija 2027 -haʹŋǩǩõõzz väʹlddtäävtõssân lij âʹlnn ââʹnned da oouʹdeed sääʹm ǩiõtt-tuâjjsilttummuž sääʹmõhttsažkååʹddest. Haʹŋǩǩõs jääʹrjast tuâjjpääʹjjseminaarid Jeänõõǥǥâst, Taarr Kautokeinost di Ruõcc beäʹlnn Kaaresuvantost. Tuâjjpääʹjjseminaarâst lij teeʹmmen jm. äʹrbbvuõđlaž teâđ vääʹltummuš sooǥǥbeäʹlest nobba.
Snimldõk: Reetta Tornensis.
Haʹŋǩǩõõzz plaaneeʹjen lij alttääm 2025 čõhččmannust Gárena-Biera Biera Juha Biret, Birit Tornensis. Tornensis lij Jeänõõǥǥ Kilpisjääuʹrest ååraš da rääʹǩǩast duodji leʹbe sääʹmǩiõtt-tuâjai raajjmõõžž. Son lij škooultõõttâm humaniistlaž tiõđi kandidaattân da puõccihoiʹddjeeʹjen. Son lij še mättʼtõõttâm sääʹmǩiõtt-tuâjaid säʹmmlai škooultõskõõskõõzzâst Jokkmookkâst Ruõccâst. Tornensis tueʹjjad tuâj olgglõssân Kilpisjääuʹr beäʹlnn.
– Alttääm tuâjaid älššas miõlin. Projeeʹkt teeʹmm leäi tuõđi vääžnai da muʹnne še jiõccsan sääʹmǩiõtt-tuâjjliʹžžen samai miõlǩieʹssi. Lij hääʹsǩes piâssâd tuejjeed tän teeʹm seʹst šiõǥǥ jooukâst, särnn Tornensis.
Duodji Akademiija 2027 -haʹŋǩǩõõzz täävtõssân lij raaveed äʹrbbvuõđlaž sääʹmǩiõtt-tuâj silttummuž sa sââʹj, tuõrvvâd äʹrbbvuõđlaž teâđ da tääidai serddmõš nuõrid di pueʹreed mättmateriaal da digitaalʼlaž tuâjjneävvai vuäǯǯamvuõđ. Lââʹssen haʹŋǩǩõs ǩiččlââtt oouʹdeed sääʹm ǩiõtt-tuâj kaʹnnteeʹjen da ǩeâllʼjeeʹjen tällõõzzlaž jieʹllemvueʹǩǩen. Haʹŋǩǩõõzzâst raajât tåimmamplaan eettlaž vuäppõõzzin, kook kueʹsǩǩe sääʹm ǩiõtt-tuâj puuʹtʼtummuž, kauppõõllmõõžž da âânnmõõžž, tuõrveeʹl nääiʹt säʹmmlai äʹrbbvuõđ teâđ.
Haʹŋǩǩõõzz tåimmjummuš vuäjjan äʹrbbvuõđlaž teâđserddmõõžž jeälltummša da raavummša luândlaž pirrõõzzâst. Haʹŋǩǩõõzz jäʹrjstem tuâjjpääʹjjseminaar taʹrjjee jm. nuõrid, ǩiõtt-tuâjjlaid, õhttõõzzid da organisaatioid vueiʹtlvažvuõđid ǩiõtt-tuâjjtääidai mättʼtõõttmõʹšše, jurddji vaajtummša da saǥstõõllmõʹšše sääʹmǩiõtt-tuâj pueʹttiääiʹjest. Seämma-ääiʹj haʹŋǩǩõs tuäʹrjj raajid râstldeei õhttsažtuâj Taarr da Ruõcc sääʹmǩiõtt-tuâjjinstituutioi da sääʹmǩiõtt-tuâj čeäppniiʹǩǩivuiʹm raaveeʹl sosiaalʼlaž õʹhttekuullâmvuõđ da kulttuursaž identiteeʹtt di sääʹmǩiõl.
Haʹŋǩǩõõzz viiǥǥât čõõđ Lääʹdd da Taarr Sääʹmteeʹǧǧ õhttsažtuâjjan, da tõn teäggat EU Interreg Aurora -programm. Meersaž vasttõsteäggtõs lij vuäǯǯuum Lappi Leettast. Haʹŋǩǩõs juätkkai eeʹjj 2027 loopp räjja.
Lââʹssteâđ:
Birit Tornensis
Plaaneeʹjj, Sámi Handicraft Academy 2027 -haʹŋǩǩõs
040 545 7740
birit.tornensis@samediggi.fi
