Iʹlmmtõõttmõš sääʹmǩiõli ougglõsõhttvuõđid äuʹǩǩeei mättʼtõõzz pilotthaʹŋǩǩõõzz pueʹtti lookkâmekka lij ååʹn jååʹttmen - iʹlmmet škooulneeʹǩǩ mieʹldd mättʼtõʹsse!

Snimldõk: Studio Borga/Sääʹmteʹǧǧ

Sääʹmǩiõli ougglõsõhttvuõđid äuʹǩǩeei mättʼtõõzz pilotthaʹŋǩǩõs lij Uccjooǥǥ kååʹdd da Sääʹmteeʹǧǧ eeʹjjest 2018 älggam haʹŋǩǩõs. Lookkâmeeʹjj 2025–2026 haʹŋǩǩõõzzâst mättʼtâʹtte âlddsin 200 škooulneʹǩǩed 122 škooulâst da 46 kååʹddest. Tän lookkâmeeʹjj ougglõsmättʼtõshaʹŋǩǩõõzzâst lij valddum ââʹnnma plaađânjvuâđđsaž neʹttmättjempirrõs Itslearning. Mättčiâssid vuässõõđât Itslearning pääiʹǩ da škooulniiʹǩǩi huõlteei peäʹsse seuʹrrjed, mii mättčiâssin lij tuejjuum da lie-a puättam leeʹks. Ååʹn Itslearning ââʹnet vuõssmõs vuâra še mättʼtõʹsse iʹlmmtõõttmõõžžâst ääiʹjben ââʹnnmest åårram Hellewi-riâžldõõǥǥ sâjja. Iʹlmmtõõttmõš kuâskk nuʹtt altteei ǥu jueʹtǩǩi škooulniiʹǩǩid da mättʼtõõttjid.

Mii mättʼtõs da ǩeäzz?

Ougglõsmättʼtõshaʹŋǩǩõs taʹrjjad sää′mǩiõl (aanar-, nuõrtt- leʹbe tâʹvvsääʹmǩiõl) vuâđđmättʼtõõzz leʹbe lookkjiškooulmättʼtõõzz tiuddeei sää′mǩiõl mättʼtõõzz 2 čiâss neäʹttlest. Ouddmättʼtõõzz škooulneeʹǩǩ vuäiʹtte še vuässõõttâd haʹŋǩǩõõzz mättʼtõʹsse. Oudd- da vuâđđškooulneeʹǩǩ vuässâʹtte mättʼtõʹsse jiiʹjjes škooulâst, da škooul âlgg jäʹrjsted ougglõs-škooulnekka oʹhjjeei. Ohjjeei vaʹsttad staan da rääuhlõs mättʼtõõttâmpirrõõzzâst ougglõsmättčiâssi ääiʹj di teeknlaž vaiggâdvuõđi räʹtǩǩummšin nåkkmi šõõddeen.

Mättʼtõs lij jurddum sääʹmškooulniiʹǩǩid da mättʼtõõđjid, kook jälste sääʹm dommvuuʹd kooʹddi åålǥbeäʹlnn da ǩeäi piârri leʹbe sooǥǥ ǩiõll lij kååʹtt-ne Lääʹddjânnmest mainstum sääʹmǩiõlin (aanarsääʹmm, nuõrttsääʹmm leʹbe tâʹvvsääʹmm). Sääʹm ij taarbaš ääiʹjben siltteed mättʼtõʹsse vuässõõttâm diõtt. Haʹŋǩǩõs ij taʹrjjed mättʼtõõzz rääʹvesoummid.

Ǩii vuäitt iʹlmmted?

Iʹlmmtõõttmõõžž vuäitt tuejjeed huõlteei, mättʼtõõzz jäʹrjsteei, rehtor leʹbe nuuʹbb tääʹzz mättʼtõõtti. Ko iʹlmmtõõttmõõžž tuejjad huõlteei, tuäivvap huõlteei leeʹd õhttvuõđâst škooulneeʹǩǩ škoouʹle, da peäggtem škooulneeʹǩǩ haalâst da vueiʹttemvuõđâst vuässõõttâd sääʹmǩiõl sääʹmǩiõl ougglõsõhttvuõđid äuʹǩǩeei mättʼtõʹsse.

Iʹlmmtõõttmõõžž mâŋŋa?

Mâŋŋa iʹlmmtõõttâmääiʹj puuttmõõžžâst haʹŋǩǩõs lij õhttvuõđâst škooulneeʹǩǩ dommkådda. Tän mâŋŋa älgg mättʼtemjoouki da sääʹm mättʼtõõzz lookkâmjiârǥ raajjmõš õhttsažtuâjast škooulivuiʹm. Juõʹǩǩ sääʹmǩiõʹlle raajât mättʼtõsjooukid jeäʹrben mättʼtõõttji ââʹǩǩ- da ǩiõlltääʹzz, lookkâmjiârǥ di škooulsäättaid pueʹrmõõzz mieʹldd lokku vääʹldeeʹl. Mättʼtõõzz jäʹrjstet ǩiõlin da jooukin, koin lie ooʹccmõsân kuõʹhtt škooulneeʹǩǩ leʹbe mättʼtõõtti. Lookkâmjiârggtuâj tuejjeet njuhččmannust ääʹljeeʹl ǩieʹssmannu loopp räjja. Täujja lookkâmjiârǥid šâʹdde muttâz veâl påʹrǧǧmannust. Mättʼtõõzz ääiʹjpooddin da čiâssi vuässõõttâmvuäppõõzzin teâđtet škooulid da dååma påʹrǧǧmannust. Ougglõsmättʼtõshaʹŋǩǩõõzz čõhččlookkâmpââʹjj älgg 17.8.2026.

Vääʹld lokku, što måtam gåårad (Heʹlssen, Oulu da Ruäʹvnjargg) jäʹrjste tâʹvvsääʹmǩiõl mättʼtõõzz âʹlddmättõssân. Mättʼtõʹsse haaʹleen, vääʹld õhttvuõđ jiijjad škooul rehtooʹre leʹbe gåårad škooulkonttra!

Iʹlmmet škooulneeʹǩǩ mättʼtõʹsse: https://www.saamenetaopetus.com/ilmoittautumisohjeet

Pueʹtti infopoodd sääʹmǩiõli ougglõsmättʼtõõzzâst

Infopodd ougglõsmättʼtõõzzâst huõlteeʹjid

Mââibaarǥ 24.3.2026 čiâss 17:30–18:30

Õhttnemliŋkk: https://teams.microsoft.com/meet/31685160188036?p=y4aVDKnSPhtJLb3LJ1

Pueʹtted tiõrvân mieʹldd sääʹmǩiõli ougglõsmättʼtõʹsse!

Lââʹssteâđ:

Laura Njunnas, haʹŋǩǩõsjååʹđteei
Uccjooǥǥ kåʹdd
laura.njunnas@edu.utsjoki.fi
040 701 2094

Anne Olli, haʹŋǩǩõskoordinaattor
Sääʹmteʹǧǧ
anne.olli@samediggi.fi
040 687 5989

https://www.saamenetaopetus.com/